СҚО-да ерекше қажеттіліктері бар 1100 балаға арналған екі жаңа оңалту орталығы ашылады

Солтүстік Қазақстан облысында ерекше қажеттіліктері бар балаларға арналған екі жаңа оңалту орталығы ашылады. Ғауез Нұрмұхамбетов әлеуметтік желідегі парақшасында атап өткендей, қазіргі уақытта №2 түзету мектебі болған ғимаратта күрделі жөндеу жүргізіліп жатыр. Ол толықтай менталдық бұзылыстары бар балалардың қажеттіліктеріне бейімделеді, деп хабарлайды QZ NEWS.

Бұл мақсатқа 700 млн теңгеден астам қаржы бөлінген. Келесі жылы орталық балаларды қабылдай бастайды. Мұнда әртүрлі бағыттағы мамандар жұмыс істейді, барлық қажетті терапия түрлері қарастырылған. Жыл сайын 500 бала оңалтудан өте алады.

«Облыста менталдық бұзылыстары және аутистік спектрдің ерекшеліктері бар шамамен 400 бала тұрады. Мұндай балаларды қолдау отбасы қасында әрі жайлы жағдайда жүзеге асуы тиіс. Сондықтан Петропавлда орталық ашу – біздің басым бағыттарымыздың бірі. Бұл — «Қамқорлық қоры» корпоративтік қорымен бірлескен жобамыз. Қор орталықты заманауи жабдықтармен және қажетті жиһазбен қамтамасыз етеді», – деді облыс әкімі.

Ерекше қажеттіліктері бар тірек-қимыл аппараты бұзылған балаларға арналған тағы бір орталық Тайынша ауданындағы Чкалов ауылында ашылады. Ол Тайынша, Ақжар және Уәлиханов аудандарынан 600-ге жуық баланы оңалтумен қамтуға мүмкіндік береді.