СҚО-ның курорттық аймағында заманауи модульдік станция ашылды

Солтүстік Қазақстан облысының курорттық аймағында, көрікті Имантау көлінің жағасында жаңа үлгідегі алғашқы модульдік құтқару станциясының салтанатты ашылуы өтті. Іс-шараға Қазақстан Республикасы Төтенше жағдайлар министрі, генерал-лейтенант Шыңғыс Әрінов қатысты, деп хабарлайды QZ NEWS.

Жаңа заманауи нысан Имантау–Шалқар курорттық аймағының қауіпсіздік жүйесін нығайтудағы маңызды қадам болды. Бұл аймақ – ішкі туризмнің танымал бағыттарының бірі.
Аталған станция жыл сайын 33 мыңнан астам адам демалатын 13 демалыс аймағының қауіпсіздігін қамтамасыз етеді.

Ашылу рәсімі барысында министр Шыңғыс Әрінов жобаның стратегиялық маңызын атап өтті.

«Бұл станцияның ашылуы – өңір үшін аса маңызды жоба. Ол демалушылардың қауіпсіздігін арттырып қана қоймай, туризмді дамыту мен курорттық аймақтардың инфрақұрылымын нығайтуға бағытталған мемлекеттік саясатқа толық сәйкес келеді. Осындай нысандардың көбеюі өңірлердің дамуына серпін беріп, ішкі туризмді ынталандырады әрі келушілердің сенімін арттырады», – деді министр.

Модульдік нысан су айдындарындағы төтенше жағдайларға жедел әрекет ету мүмкіндігін едәуір арттырып, курорттық аймақтағы демалысты бұрынғыдан да қауіпсіз етпек.