СҚО мен Ресей өңірлері туризм және саяхат саласындағы ынтымақтастықты кеңейтуде
Қазақстан мен Ресейдің өңіраралық ынтымақтастығының XXII форумы аясында туризм саласын дамытуға және екі ел өңірлері арасындағы байланысты нығайтуға бағытталған екі меморандумға қол қойылды. Жаңа келісімдер бірлескен жобаларды жүзеге асыруды, туристік бағыттарды кеңейтуді және саяхатшылар үшін қолайлы жағдай жасауды көздейді. Бұл туралы өзінің әлеуметтік желідегі парақшасында Солтүстік Қазақстан облысының Туризм қауымдастығының төрағасы Владимир Витченко мәлімдеді, деп хабарлайды QZ NEWS тілшісі.
Алғашқы меморандум Қазақстан мен Ресейде белсенді демалысты ұйымдастыруға маманданған «ТРЭВЕЛ СНОБ» ЖШҚ-мен жасалды. Құжатқа компанияның бас директоры Анна Статва қол қойды.
Ынтымақтастық аясында өзенмен рафтинг, тау туризмі, жаяу серуендеу бағыттары және табиғат аясындағы саяхатты ұнатушыларға арналған өзге де бағдарламаларды қамтитын белсенді туризмнің жаңа бағыттары дамытылады. Сонымен қатар, тараптар туристік маршруттарды бірлесіп ілгерілетуге, тәжірибе алмасуға және ішкі әрі келу туризмін дамытуға ықпал ететін жобаларды жүзеге асыруға ниетті.
Екінші меморандум Омбы қаласындағы «Миллениум» қонақүй кешенін басқаратын «Миллениум-недвижимость» ЖШҚ-мен жасалды. Келісімге компания директоры Инна Байдакова қол қойды.
Аталған қонақүй кешені бүгінде Солтүстік Қазақстан облысынан келетін ұйымдастырылған туристік топтарды қабылдап келеді. Жаңа келісім ынтымақтастықты кеңейтуге, туристерге көрсетілетін қызмет сапасын арттыруға, жаңа бірлескен бағыттарды әзірлеуге және өңір тұрғындарының Ресейге сапарын барынша жайлы етуге мүмкіндік береді деп күтілуде.
Қол қойылған құжаттар шекаралас өңірлердің туристік әлеуетін дамытуға бағытталған нақты жұмыстардың негізіне айналмақ.
«Қол қойылған меморандумдар тек ниет туралы құжат болып қалмай, нақты бірлескен жұмыстың бастамасы болады деп сенемін. Ресейлік серіктестермен бірге жаңа туристік өнімдерді дамытып, өңіраралық ынтымақтастықты нығайтып, саяхатшылар санын арттыруға және Қазақстан мен Ресей арасындағы туризмді дамытуға жаңа мүмкіндіктер жасауға күш саламыз», – деді Владимир Витченко.