Халық қаһарманы Айдын Айымбетов Kozybaev University студенттерімен кездесті

Солтүстік Қазақстан облысында құрметті қонақ – ұшқыш-ғарышкер, Халық қаһарманы, авиация генерал-майоры Айдын Айымбетов келді. Оның сапарының негізгі бөлігі жас ұрпақпен диалогқа арналды. Kozybaev University-де ғарышкер студенттермен және профессорлық-оқытушылық құраммен кездесті, деп хабарлайды QZ News тілшісі.

Айдын Айымбетовтің университетке сапары аты берілген ағаш отырғызудан басталды. Кейін құрметті қонақ оқу-зертханалық корпусқа барып, университеттің екі зертханасының жетістіктерімен танысты.

Кеш бағдарламасы студенттермен және оқытушылармен кездесумен жалғасты. Кездесудің мақсаты – елдегі патриоттық тәрбиені, ғарыш саласын және оның дамуын насихаттау екенін Айдын Айымбетов атап өтті.

– Өздеріңіз білесіздер, 30 сәуірде жаңа «Союз-5» зымыранының алғашқы сынақтық ұшырылымы өтті. Жастарға Қазақстанға жаңа технологиялық серпіліс қажет екенін түсіндіру маңызды. Біздің жастардың әлеуеті өте жоғары, – деді ұшқыш-ғарышкер.

Ғарышкерге дәстүр бойынша ұлттық шапан да сыйға тартылды. Солтүстік Қазақстан облысына сапары үшін алғысын облыс әкімі аппаратының жетекшісі Руслан Әлішев білдірді.

– Цифрлық технологиялар дәуірінде кез келген спикерді интернеттен табуға болады. Бірақ мұндай жылулықты тек осындай тікелей кездесулер ғана береді. Сіз – еңбектену, патриотизм, өзін-өзі дамыту және нақты мақсат қоя білу үлгісін көрсететін тұлғасыз, – деді ол.

Кездесу барысында ғарыш саласы тақырыбы талқыланды. Айдын Айымбетов өз тәжірибесімен бөлісіп, қатысушылардың сұрақтарына жауап берді. Соңында университеттің белсенді студенттері мен оқытушыларына атаулы дипломдар мен сыйақылар табысталды.