IAAR агенттігінің сыртқы сараптау комиссиясы Kozybayev University білім беру бағдарламаларының сапасын бағалауға кірісті

Kozybayev University-де Тәуелсіз аккредитация және рейтинг агенттігінің (IAAR) сыртқы сараптау комиссиясы жұмысын бастады. Сарапшылардың сапары 14–16 сәуір аралығында өтеді және бұл жоғары оқу орнының білім беру бағдарламаларын мамандандырылған аккредитациядан өткізу рәсімінің бір бөлігі болып табылады, деп хабарлайды QZ NEWS тілшісі.

Үш күн ішінде сарапшылар университет қызметінің негізгі бағыттарына кешенді баға береді. Негізгі назар білім беру бағдарламаларын іске асыру сапасына, оқу-әдістемелік қамтамасыз ету деңгейіне, ғылыми-зерттеу жұмыстарына, кадрлық әлеуетке, сондай-ақ материалдық-техникалық базаның жағдайына аударылады.

Аккредитациялық тексеруден түрлі даярлау бағыттары бойынша бағдарламалар өтуде. Олардың қатарында «Агрономия», «Орман ресурстары және орман шаруашылығы», «Биология», «Шетел тілі: екі шетел тілі», «Орыс тілі мен әдебиеті», «Қазақ тілі мен әдебиеті», «Филология», «Жалпы медицина», «Фармация», «Биотехнология», «Химиялық сараптама және өндірісті аналитикалық бақылау», «Тағам қауіпсіздігі», «Өсімдіктер туралы ғылым және технологиялар» бар.

Сыртқы сараптау комиссиясының жұмысы университет ұсынатын білім беру қызметтерінің сапасын растауда маңызды кезең болып табылады. Аккредитация рәсімі оқу бағдарламаларының халықаралық стандарттарға сәйкестігін бағалауға бағытталған және жоғары оқу орнының академиялық әрі ғылыми қызметін одан әрі дамытуға ықпал етеді.

Комиссия жұмысының нәтижелері білім беру бағдарламаларының алдағы мәртебесі мен олардың ұлттық және халықаралық деңгейдегі бәсекеге қабілеттілігіне қатысты шешімдер қабылдауға негіз болады.