Петропавлда 144 км топырақ жол 5 жыл ішінде асфальтқа ауыстырылады
Петропавлда жол құрылысының қорытындысы жарияланды. Қаладағы көше-жол желісінің жалпы ұзындығы 366 км болса, соның 144 км-ін топырақ жолдар құрайды. Олар алдағы бес жыл ішінде кезең-кезеңімен асфальтқа ауыстырылмақ. Бұл туралы өңірлік коммуникациялар қызметінің брифингінде облыс орталығының әкімі Серік Мұхамедиев хабарлады, деп жазады QZ NEWS.
Әкімнің айтуынша, қаржыландыру қысқарғанына қарамастан, биыл жалпы ұзындығы 11 км болатын 16 қиыршық тас жолы асфальтталды. Сонымен қатар, келесі жылға 26 дайын жобалық-сметалық құжаттама бойынша бюджет өтінімі тапсырылды, олардың 25-і тағы 17 км топырақ жолды асфальтпен жабуды көздейді.
«Биыл 5 негізгі өтпелі жоба іске асырылуда: Малая көшесі (1,3 км), Универсальная көшесі бойындағы жол өтпесі – аяқталу мерзімі 2026 жылдың маусым–шілдесі, Қазбек Байболов көшесі (0,43 км), Фрунзе көшесі (2,6 км), Кизатов көшесі. 48 көшеге орташа жөндеу жобалары әзірленді, оның 47-сі – қатты жабыны жоқ көшелер», – деді Серік Мұхамедиев.
Қала әкімі жазғы жол күтімі бойынша да ақпарат берді. Биыл жолдарды жазғы күтіп-ұстауға 1,786 млрд теңге бөлінді. Маршруттық әдіспен ұзындығы 20 км-ден асатын 15 көшеде жұмыстар атқарылды. 10 мың м² алаңда шұңқыр жөндеу жүргізілді.
Серік Мұхамедиев қысқы жол күтімі мәселесіне де тоқталды.
«Қысқы күтім бойынша Петропавл қаласының «Тұрғын үй қызметі» ЖШС-мен үш жылдық келісімшарт жасалған. Қала 9 учаскеге бөлінген, қар механикаландырылған тәсілмен тазаланып, кейін арнайы полигондарға шығарылады. 2025 жылдың қаңтар–сәуір айларында 980 мың м³ қар шығарылды. Күн сайын шамамен 170 техника жолға шығады. Қар «Шаховское» ҚТҚ полигоны маңына және Заречный ауылындағы су желілерінің ар жағына жеткізіледі. Полигондарда жасанды интеллекті бар камералар орналасқан», – деді қала әкімі.
ЖИ-камералар қар шығару бағытын, жүктеу орнын, көліктің мемлекеттік нөмірін, шығу және кіру уақытын тіркейді. Бұл жүйе жұмыстың ашықтығын арттырып, шығындарды оңтайландыруға және деректерді жылдам жинауға мүмкіндік береді.
«Жолда көктайғақтың алдын алу үшін қиылыстар, жаяу жүргінші өткелдері және қауіпті учаскелер құм-тұз қоспасымен өңделеді. Қоғамдық көлік аялдамаларына баратын жолдар мен аялдама алаңдары химиялық реагенттермен өңделеді», – деп түйіндеді Петропавл әкімі.