Петропавлда Ахмет Байтұрсынұлы туралы фильмнің алғашқы көрсетілімі өтті

Петропавлда халқымыздың біртуар перзенті, қайраткер тұлға, публицист, ағартушы, педагог Ахмет Байтұрсынұлы туралы жаңа фильмнің алғашқы көрсетілімі өтті, деп хабарлайды QZ Media тілшісі.

Жаңа туындыны тамашалауға СҚО әкімі Ғауез Нұрмұхамбетов, ақсақалдар, депутаттар, қоғам өкілдері мен жастар жиналды.

«Соңғы үкім» атты көркем фильмі ұлт ұстазының күреске толы тағдырының мәлім де беймәлім тұстары көрсетіліп, бірегей тұлғаның өмір жолы кеңінен сипатталды.

Алаш қозғалысының негізін қалаушылардың бірі, қазақ әліппесінің авторы Ахмет Байтұрсынұлының ел тарихында алар орны ерекше. Оның рухани мұрасы халқымызға осы күнге дейін пайдасын тигізуде. Осының барлығын болашақ ұрпақ біліп өсуі тиіс, аталмыш танымдық-ағартушылық кино арқылы халқымыздың белгілі тұлғалары туралы тың деректер адамдардың жадында сақталады.