Петропавлда ерекше білімді қажет ететін балаларға бағытталған жобалардың қорытындысы шығарылды
Солтүстік Қазақстан облысының үкіметтік емес секторында «Инклюзивті қоғамды дамыту» бағыты бойынша шағын гранттар конкурсы аясында қаржыландырылған бірқатар жобалар сәтті аяқталды. ҚР Мәдениет және ақпарат министрлігі мен «Эра-KZ» РҚБ қолдаған бастамалар аутизмі бар балаларды оқытуға, педагогтарды дайындауға және спорттық әлеуметтендіруге бағытталды, деп хабарлайды QZ NEWS.
Ең көзге түскен жобалардың бірі – «Менің балам» ҚБ жүзеге асырған «Сиқырлы ине» жобасы. Жоба аясында аутизмі бар 15 балаға тігін өнері үйретілді. Балалар пішім жасауды, тігін тігуді және тігін машинасымен жұмыс істеуді меңгерді. Оқу барысында 5 көрпе, 15 жастық, 9 киізден жасалған картина және түрлі жұмсақ ойыншықтар дайындалды. Балалардың жұмыстары Шухов атындағы кітапханада көрмеге қойылды.
«АРДОС-Жүрек» ҚБ білім беру саласындағы кедергілерді азайтуға бағытталған жобаны жүзеге асырды. «Барлығы үшін инклюзивті білім беру» жобасы аясында облыс аудандары мен қалада 111 педагогқа инклюзивті білім беру саласындағы құқықтар мен құзыреттер бойынша семинарлар өткізілді. Педагогтар өз жұмысындағы сенімділіктің артқанын айтса, оқушылар ерекше білімді қажет ететін сыныптастарына деген ықыластың күшейгенін атап өтуде. Жоба кедергісіз мектеп қалыптастыруға ықпал етеді. Оқушылар достық, өзара көмек және тең мүмкіндіктер тақырыптарын белсенді талқылап, әр адамның ерекшелігіне қарамастан құрмет пен қолдауға лайық екенін түсінуді үйренді.
«Bolashak Charity» қоғамдық қоры балалардың «Uni football league» республикалық турниріне қатысуын қамтамасыз етті. Петропавлдан даму ерекшелігі бар 20 бала ата-аналары және бапкерлерімен бірге жарысқа қатысты. Жоба балаларға командада ойнаудың қуанышын сезінуге, әлеуметтенуге және өз-өзіне деген сенімді нығайтуға мүмкіндік беретін қауіпсіз орта құрды. Әр бала өзін көрсетуге, командалық қолдауды сезінуге және мойындалуға мүмкіндік алды.
«Петропавл шағын гранттардың жүйелі өзгерістерге қалай ықпал ете алатынын көрсетті. Аутизмі бар балаларды сұранысқа ие өнерге оқытудан бастап жүзден астам педагогтың біліктілігін арттыруға дейін – бұл жобалар СҚО-да шын мәнінде инклюзивті мәдениетті қалыптастырудың негізін қалап отыр», – деді ұйымдастырушылар.