Петропавлдағы бос жұмыс орындары жәрмеңкесінде 30-дан астам компания қызметкерлер іздеді
Петропавл қаласындағы Kozybayev University базасында жұмыс іздеп жүрген жастар мен жұмыс берушілерді, сондай-ақ мемлекеттік құрылым өкілдерін біріктірген ауқымды «Мүмкіндіктер мен бос жұмыс орындары жәрмеңкесі» өтті, деп хабарлайды QZ NEWS тілшісі.
Іс-шараны қалалық Жастар ресурстық орталығы, Мансап орталығы және Қоғамдық даму және ақпарат орталығы ұйымдастырды.
Жәрмеңкенің басты мақсаты – Солтүстік Қазақстан облысының жастарын, соның ішінде NEET санатындағы жастарды жұмыспен қамтуға жәрдемдесу және жұмыс берушілер мен әлеуетті қызметкерлер арасында тікелей байланыс орнату алаңын құру болды.
Петропавлдағы 30-дан астам кәсіпорын мен ұйым өздерінің бос жұмыс орындарын, тағылымдамадан өту бағдарламаларын және мансаптық өсу мүмкіндіктерін таныстырды. Қатысушылар қатарында «С.М. Киров атындағы зауыт» АҚ, «KYZYLZHAR BUSES» ЖШС, «Масло-Дел» ЖШС, «СК Качество» ЖШС, «Барс-NORD» ЖШС, «BIGBAGGLOBAL» ЖШС, СҚО бойынша Қылмыстық-атқару жүйесі департаменті, Петропавл қаласының пробация қызметі бөлімі, ҚР ІІМ СҚО бойынша Мамандандырылған күзет қызметі басқармасы, Ұлттық сараптама орталығының филиалы және өңірдің басқа да жұмыс берушілері болды.
Жәрмеңкеге жоғары оқу орындары мен колледж түлектері, жас мамандар, жоғары курс студенттері және жұмысқа орналасуға қызығушылық танытқан облыс тұрғындары қатысты. Олардың көпшілігі іс-шара алаңында алғашқы сұхбаттасудан өтіп, жұмыс берушілерге өздерін қызықтырған сұрақтарды қойып, түйіндемелерін қалдыру мүмкіндігіне ие болды.
Қоғамдық даму және ақпарат орталығының жастар бастамалары бөлімінің басшысы Анастасия Волкованың айтуынша, мұндай кездесулер жастарға еңбек нарығын жақсырақ түсінуге және кәсіби дамудың нақты мүмкіндіктерін табуға көмектеседі.
– Қалалық Жастар ресурстық орталығымен және Мансап орталығымен бірлесіп, жастарға, оның ішінде NEET санатындағы жастарға арналған мүмкіндіктер мен бос жұмыс орындары жәрмеңкесін өткізіп келеміз. Биылғы шараға Петропавлдың 30-дан астам жұмыс берушісі қатысты. Біз үшін жастардың жұмыс табуына көмектесу ғана емес, сонымен қатар олардың әрі қарай дамуына арналған барлық мүмкіндіктерді көрсету маңызды. Бұл – білім алу, біліктілікті арттыру немесе жеке кәсіп ашу бағыттары болуы мүмкін. Әрбір жас қажетті ақпарат алып, пайдалы байланыстар орнатып, өз кәсіби болашағына сенімді болуы үшін жағдай жасауға тырысамыз, – деді Анастасия Волкова.
Биылғы жәрмеңкенің ерекшелігі бірнеше тақырыптық ақпараттық-консультациялық алаңдардың жұмыс істеуі болды. Мәселен, Отбасы банкінің өкілдері жастарға қаржылық сауаттылық, қолданыстағы қолдау бағдарламалары және мансап құру мен жеке жобаларды жүзеге асыруда пайдалы болатын заманауи банк құралдары туралы ақпарат берді.
Кәсіпкерлікті дамыту мәселесіне де ерекше назар аударылды. Қатысушылар бизнеске арналған мемлекеттік қолдау шаралары, гранттық бағдарламалар, бастаушы кәсіпкерлерге арналған білім беру курстары және стартаптарды сүйемелдеу тетіктері туралы білді.
Сондай-ақ заңгерлік кеңестер де үлкен сұранысқа ие болды. Мамандар еңбек заңнамасы, еңбек қатынастарын рәсімдеу және қызметкерлердің құқықтарын қорғау мәселелерін түсіндірді. Бұдан бөлек, жастар психологиялық қолдау алып, мамандық таңдау, өзіне деген сенімсіздікті жеңу және қазіргі еңбек нарығының талаптарына бейімделу тақырыптарын талқылады.
Жәрмеңке аясында мемлекеттік жастар бағдарламаларына арналған ақпараттық-түсіндіру алаңы да жұмыс істеді. Мұнда қатысушыларға жұмыспен қамту, білім беру, волонтерлік қызмет, жастар кәсіпкерлігі, тұрғын үй және әлеуметтік бастамалар саласындағы жобалар туралы жан-жақты ақпарат берілді.