СҚО-да кадрлық ауыс-түйіс орын алды

СҚО әкімінің өкімімен Жанат Ғаббасұлы Сәдуақасов Солтүстік Қазақстан облысы әкімдігінің энергетика және тұрғын үй-коммуналдық шаруашылық басқармасы басшысының міндетін атқарушы болып тағайындалды, деп хабарлайды QZ Media тілшісі.

Жанат Сәдуақасовқа 2024 жылдың қаңтар айының соңында осы ведомство басшысының міндеттері уақытша жүктелді. Бұған дейін ол Қызылжар ауданының әкімі лауазымында алты жыл жұмыс істеді.

Сонымен қатар, облыс әкімінің өкімімен Владислав Геннадьевич Лукин Солтүстік Қазақстан облысы әкімдігінің мемлекеттік сәулет-құрылыс бақылау және лицензиялау басқармасының басшысы болып тағайындалды.

Владислав Лукин осы тағайындауға дейін 2023 жылдың тамызынан бастап энергетика және ТҮКШ басқармасында жұмыс істеді. Ведомствода әртүрлі лауазымда тер төкті, орынбасар, осы басқарма басшысының міндетін атқарушы және уақытша атқарушы болды. Атқамінер 2020 жылдың соңынан 2023 жылдың жазына дейін Мамлют ауданының әкімі болғаны белгілі.