Петропавлда жас суретшілер мультфильмдердегі сүйікті кейіпкерлерді асфальтқа салды

Халықаралық балаларды қорғау күніне облыстық балалар мен жасөспірімдер шығармашылығы орталығы жан-жақты дайындалған, деп хабарлайды QZ Мedia тілшісі.

Мереке иелері үшін “Өнер әлемі” атты шығармашылық орта, сәндік-қолданбалы шығармашылық байқау, сурет салу, робототехника бойынша шеберлік сабақтары ұйымдастырылды. Ал ең белсенді балалар эстафеталар мен викториналарға қатысты. Облыстық балалар мен жасөспірімдер шығармашылығы орталығы ғимаратының алдында ұлдар мен қыздар бормен сурет те салды.

“Біз қаламыз бен облысымыздың балалары үшін шығармашылық алаңдар ұйымдастырдық. Балаларға асфальтта сурет салу байқауы әрдайым ұнайды, біз оны жыл сайын 1 маусым күні өткіземіз. Балғындар күнді, мультфильмдердегі сүйікті кейіпкерлерін салады. Балаларды осы тамаша мерекемен құттықтаймын. Олардың жүздерінде әрқашан күлкі болсын”, – деді облыстық балалар мен жасөспірімдер шығармашылығы орталығы әдістемелік бөлімінің меңгерушісі Жәмила Құжыбаева.