Ғауез Нұрмұхамбетов: “Талантты, қабілетті жастардың ғылыммен айналысуына жағдай жасау қажет”

СҚО әкімі Ғауез Нұрмұхамбетов Мағжан Жұмабаев атындағы ІТ мектеп-лицейінде болып, балалармен бірнеше кездесулер өткізді, деп хабарлайды QZ Media тілшісі.

Өңір басшысы Халықаралық балаларды қорғау күніне арналған «Көңілді старттар» спорттық іс-шарасы финалының жеңімпаздарын марапаттады. Мектепте облыс әкімі Мағжан оқуларына дайындалып жатқан әдеби үйірме мүшелерімен де жүздесті.

“Білімді жетілдіру, тұлғалық өсу және рухани даму үшін кітап оқудың маңыздылығын атап өттім. Жастарға сеніп, оларды игі істер жасауға шабыт беріп келе жатқан жерлесіміз, ұлы ақын Мағжан Жұмабаев өскелең ұрпаққа  жол көрсетуші  екені сөзсіз”, – деп жазды өңір басшысы әлеуметтік желіде.

Сондай-ақ Ғауез Нұрмұхамбетов жалпы білім пәндері бойынша республикалық олимпиада жеңімпаздары және жүлдегерлерімен кездесіп, оларға дипломдар мен  ақшалай сыйақылар табыс етті. Облыста қазір республикалық олимпиадалар мен ғылыми жобалар сайысының 35 жеңімпазы мен жүлдегері бар. Мемлекет басшысы білім мен ғылымды дамытуға ерекше көңіл бөледі. Бұл біздің еліміз үшін стратегиялық маңызды басымдық.

“Талантты, қабілетті жастардың ғылыммен айналысуына жағдай жасау қажет. Білімді ұрпақ қана елді жаңа белестерге жеткізе алады. Оқушыларға еліміздің дамуы жолында өз мүмкіндіктерін толық жүзеге асыруға тілектестік білдірдім”, – деді СҚО әкімі.