СҚО-да 30 ағылшын тілі пәні мұғалімі “Fulbright FLTA” бағдарламасы аясында оқудан өтті

Петропавлда ағылшын тілі пәні мұғалімдеріне арналған семинар аяқталды. Ол “Fulbright FLTA” бағдарламасы аясында өтті. Шараға облыс аудандарынан келген 30 педагог қатысты. Мамандарға қатысушы ретінде сертификаттар табысталды, деп хабарлайды QZ Мedia тілшісі.

“Біздің педагогтар 3 күн бойы өздерінің әдіс-тәсілдерін көрсетті, шеберлік сабақтарын өткізді. Сонымен қатар, өздері де оқыды. Мұндай шара біздің облыста алғаш рет өтуде. Қалада тұру, тамақтану шығынын қауымдастық көтерді”, – деді СҚО білім басқармасына қарасты әдістемелік орталықтың директоры Роза Сәркен.

Ағылшын тілі пәні мұғалімдері “Fulbright FLTA” бағдарламасы аясында АҚШ университеттерінде қазақ тілінде оқыту мүмкіндігін иеленеді, ал шетелдік студенттер ҚР-ға ағылшын тілін үйрету үшін келе алады.

“Ауылдан келген ағылшын тілі пәні мұғалімдеріне әдістемелік көмек көрсетеміз. Біз тәжірибе алмасамыз. Бұл семинар мұғалімдердің көптеген мүмкіндігін ашады. Біз оларды АҚШ елшілігінің басқа да бағдарламаларымен таныстырамыз. Сонымен қатар, ойын-сауық бағдарламасы қарастырылды”, – деді “Fulbright FLTA” бағдарламасының фасилитаторы Динара Қайыпова.