Енді Петропавлдан Шымкентке 25 мың теңгеге ұшуға болады

Жағымды жаңалық! Петропавл халықаралық әуежайы өз жолаушыларына жаңа бағыт ұсынады. Бұған дейін облыс орталығынан Астана мен Алматыға ғана ұшуға болатын. Енді Шымкентке ұшақ арқылы жетуге мүмкіндік бар. Жаңа рейс 17 маусымда ашылды, деп хабарлайды QZ Media тілшісі.

«Былтыр бізден Түркістанға рейс болды, бірақ жолаушы аз қатынады. Сондықтан, көп уақыт өтпей жабылып қалды. Әкiмдiктiң қолдауымен бүгiн Шымкентке алғашқы рейс ұшырып жатырмыз. Ол аптасына екі рет болады: дүйсенбі және бейсенбі күндері. Бұл рейс сұранысқа ие болады деп ойлаймын. Біз Алматыға ұшу жиілігін арттыру нұсқасын да қарастырып жатырмыз. Мемлекетке рейстерді субсидиялағаны үшін алғыс айтамыз, өйткені онсыз алға жылжу мүмкін емес», – деді инвестор өкілі Евгений Тюрморезов.

Петропавл-Шымкент бағытындағы ұшақ билеті 25 мың теңге тұрады. Алматыға рейс 5 мыңға қымбат. Ал Астанаға 15 мың теңгеге жете аласыз. Естеріңізге сала кетейік, Петропавлдағы әуежай техникалық қызмет көрсету мәселесіне байланысты ұзақ уақытқа жабылған болатын. 2022 жылдың жазында аэропорт бес жылға жеке компанияның сенімді басқаруына берілді.