Сқо әкімі Ғауез Нұрмұхамбетов өңір журналистерін кәсіби мереке – бақ күнімен құттықтады

Ғауез Нұрмұхамбетов өңір журналистерін кәсіби мереке – БАҚ күнімен құттықтады. Салтанатты кездесу облыс әкімдігінде өтті, деп хабарлайды QZ Мedia тілшісі.

Өңір басшысы атап өткендей, бұқаралық ақпарат құралдарының қарқынды дамуына қарамастан, журналист мамандығы ерекше, қызықты әрі күрделі болып қала береді.

“Саланың негізі журналистика ардагерлерінде жатыр. Олар БАҚ-ты дамытуға күш жұмсады. Өздерінің жұмыстарымен оқырмандардың, тыңдаушылар мен көрермендердің сенімін ақтады. Дәстүр жалғасын тауып келеді. Сіздердің ең жақсы қасиеттеріңіз – белсенді азаматтық ұстаным және әділдікке ұмтылу, халықтың мүддесіне адалдық пен талапшылдық – ең биік құрметке лайық”, – деді Ғауез Нұрмұхамбетов.

Сондай-ақ, облыс әкімі өңір журналистері тасқын кезінде аянбай тер төккенін атап өтті. Тілшілер апат орындарында жүрді, жағдайдың маңыздылығын жазды, тұрғындарға қабылданған шараларды жеткізді.

“Су тасқыны кезінде сіздердің репортаждарыңыздың, мақалаларыңыздың, бейнематериалдарыңыздың арқасында Солтүстік Қазақстан облысында халықтың қаншалықты жауапты және ұйымшыл екенін көрдік. Сіздер әскери қызметкерлер, полиция қызметкерлері, еріктілер және қарапайым азаматтар жайлы қалам тербедіңіздер. Бұл – апатпен күресте алдыңғы шепте жүргендер. Жерлестеріміздің мәселелеріне бей-жай қарамағандарыңыз үшін рахмет! Сіздер үлкен және маңызды жұмыс істеп жатырсыздар. Жұмыстарыңыз әрқашан лайықты бағалансын! Мен әрқашан сіздердің қолдауларыңызды сезінемін, сіздердің пікірлеріңізге сүйенемін. Арадағы ынтымақтастық үшін шын жүректен ризашылығымды білдіргім келеді. Біз сіздердің облысымызды бірлесіп дамытуға бағытталған еңбектеріңізді жоғары бағалаймыз”, – деп атап өтті өңір басшысы.

Мереке құрметіне орай СҚО әкімі БАҚ қызметкерлерін өңірдің ақпараттық кеңістігіне қосқан құнды үлестері үшін марапаттады.