Петропавлда полиция қызметкерлері, прокурорлар мен еріктілер бір күнде 100-ден астам наркографитті өшірді

Петропавлда жасөспірімдер арасындағы нашақорлықпен күрес бойынша акция өтті. Мұндай шара бір айда екінші рет ұйымдастырылды, деп хабарлайды QZ News тілшісі.

Акцияның бастамашысы Солтүстік Қазақстан облысының прокурорлары, полиция және жергілікті атқарушы органдары болды, олар өз күштерін 50 еріктімен біріктірді. Жерлестеріміз қала көшелеріне шығып, синтетикалық есірткі сататын интернет-ресурстардың граффити түріндегі атауын бояп шықты.

Жұмыс Петропавл қаласының 19-шы шағын ауданында жүргізілді. Бұрын мұндай жазбалар орталық көшелерде жиі кездесті, қазір негізінен гараж кооперативтері мен бейнебақылау құралдары жоқ жерлерде жиі кездеседі. Акция барысында еріктілер мен құқық қорғау органдары 30-ға жуық баллонды қолдана отырып, осындай 100-ден астам жазбаны бояп тастады.

Акция нашақорлықпен күресте күш-жігерді біріктірудің және өскелең ұрпақты оның зардаптарынан қорғаудың жарқын үлгісіне айналды.