Қалалық жастар ресурстық орталығының белсенділері 15 педагогқа алғыс хат табыстады

Мұғалімдер күні қарсаңында Петропавл жастар ресурстық орталығының белсенділері мектеп пен колледждердің 15 педагогына арнап салтанатты жиын өткізді, деп хабарлайды QZ News тілшісі.

“Ұстаздарды құттықтаймыз, еріктілер ән орындайды, артынша дастархан жайып, әр ұстазға гүл шоқтарын тарту етеміз, орталықпен ынтымақтастық үшін алғыс хаттарын да таратамыз. Шай ішу кезінде мереке иелері тәжірибе алмасып, өзара таныса алады”, – деді Петропавл жастар ресурстық орталығының жетекшісі Дамир Әбдин.

Шақырылғандардың қатарында Солтүстік Қазақстан облыстық олимпиада резервінің мамандандырылған мектеп-интернат-колледжі басшысының тәрбие жұмысы жөніндегі орынбасары Светлана Захарова да бар. Ол білім саласында 20 жылға жуық еңбек етіп келеді.

“Мектеп-интернат-колледжде 13 жыл жұмыс істеймін, оған дейін балабақшада жұмыс істедім. Менің ойымша, ұнайтын жұмыс ешқашан ауыр болмайды. Мен өз ісімді өте жақсы көремін. Әріптестерімді келе жатқан мерекемен құттықтағым келеді. Оларға денсаулық пен табыс тілеймін”, – дейді Светлана Захарова.