СҚО балуаны Жоламан Дәуренбеков ардагерлер арасында өткен әлем чемпионатында күміс жүлде еншіледі

2024 жылғы 8-13 қазан аралығында Хорватияда еркін және грек-рим күресінен ардагерлер арасында 2024 жылғы әлем чемпионаты өтті, деп хабарлайды QZ News тілшісі.

Біздің жерлесіміз Жоламан Дәуренбеков 62 кг дейінгі салмақ дәрежесінде өнер көрсетіп, ардагерлер арасындағы әлем чемпионатының күміс жүлдегері атанды. Тартысты финалда солтүстікқазақстандық финляндиялық 7 дүркін әлем чемпионына жеңілді. Есеп 8:5 болды.

Жоламан Дәуренбеков халықаралық дәрежедегі спорт шебері, грек-рим күресінен КСРО чемпионы, Қазақстан чемпионатының бірнеше дүркін чемпионы, әлем кубогының жүлдегері, Италия, Португалия, Финляндия, Жапония және басқа да елдерде өткен жарыстардың бірнеше дүркін жеңімпазы.