Петропавлда әлі де жылуға қосылмаған үйлер бар

14 қазандағы жағдай бойынша Петропавлда 1 170 көппәтерлі тұрғын үйдің 1 165-і орталық жылу жүйесіне қосылды, деп хабарлайды QZ News тілшісі «Севказэнерго»АҚ-ға сілтеме жасай отырып.

“Қалған 5 тұрғын үй бойынша жағдай мынадай: Әуезов к-сі, 173, Есіл к-сі, 34 үйде қызмет көрсетуші ұйым үйдің ішкі жылыту жүйесіндегі ақауларды жою бойынша жұмыстар жүргізуде. Жұмабаев көшесі, 282 үйде құрылыс салушының үнемдеу бастамасымен жылу жоқ. Алтынсарин к-сі, 21, Горький к-сі, 6 үйде жылумен жабдықтау шарттары жоқ”, – делінген «Севказэнерго» АҚ баспасөз қызметінің хабарламасында.

Зауыттар, көлiк бiрлестiктерi, құрылыс ұйымдары сияқты заңды тұлғалар үнемдеу мақсатында меншiк иелерiнiң бастамасы бойынша толық қосылмаған. Жеке тұрғын үй секторындағы 1 933 объектінің 18-і меншік иелерінің бастамасымен жылуға қосылмаған күйінде қалып отыр.

“Еске салайық, нысандарды жылуға қосқаннан кейін желілік су мен қысымның температурасын тұрақтандыру керек. Ал жүйенің гидравликалық және температуралық режимін реттеуге үш аптаға жуық уақыт кетеді. Бұл үдеріске “Петропавл жылу желілері” ЖШС мамандары ғана емес, нысандарға қызмет көрсететін меншік иелері мен ұйымдар да қатысады”, – деп хабарлады “Севказэнерго” АҚ баспасөз қызметі.