Солтүстікқазақстандықтар WorldSkills Kazakhstan – 2024 чемпионатында 7 медаль жеңіп алды

«WorldSkills Kazakhstan – 2024» IX республикалық кәсіптік шеберлік чемпионатының жеңімпаздарының есімдері анықталды. Сайысқа аймақтық кезеңдерден өткен 550-ден астам колледж студенттері қатысты, деп хабарлайды QZ News тілшісі.

ҚР Оқу-ағарту министрлігі хабарлағандай, қатысушылар үш күн бойы 30 құзіреттілік бойынша мықты атағын сарапқа салды. Финалға шыққандардың кәсіби шеберліктерін 558 сарапшы бағалады.

Барлығы үш күнге созылған чемпионаттың қорытындысы бойынша 30 негізгі құзырет бойынша 108 жеңімпаз анықталды. Олар 32 алтын, 37 күміс және 39 қола медаль жеңіп алды. 155 қатысушы «Үздік» медальон» марапатына ие болды. Солтүстік Қазақстан облысының намысын зияткерлік сайыста 18 жас қорғады. Облысымыздың қоржынында 2 алтын, 3 күміс және 2 қола бар.

Айта кетейік, жеңімпаздар еліміздің жетекші компанияларынан жұмысқа ұсыныс алып, келесі жылы Данияда өтетін «EuroSkills» чемпионатына қатысу үшін ұлттық құрама сапына қосылу мүмкіндігіне ие болды.