Сөйлеу қабілеті қайта оралды: Петропавлда нейрохирургтар миға аса күрделі операция жасады

60 жастағы қала тұрғынын бір ай бойы бас ауруы мазалап кенеттен сөйлеу қабілеті жоғалған. Жедел медициналық жәрдем көрсететін көпсалалы қалалық аурухананың дәрігерлері ірі жаңа түзілісті сәтті алып тастап, науқасты толыққанды өмірге қайта оралтты, деп хабарлайды QZ NEWS.

Ауру шамамен бір ай бұрын басталған. Ер адамды тұрақты бас ауруы, әлсіздік пен жүрек айну мазалаған. Уақыт өте келе жағдайы нашарлап, бет әлпетінің асимметриясы пайда болып, сөйлеу қабілетінде елеулі қиындықтар туындаған — науқасқа сөздерді айту барған сайын қиындай түскен.
Солтүстік Қазақстан облысы бойынша Әлеуметтік медициналық сақтандыру қоры филиалының баспасөз қызметінің мәліметінше, бастапқыда инсульт деген болжам жасалған. Алайда МСКТ және МРТ тексерістері нақты себепті анықтады — мидың сол жақ бөлігінде кистозды-солидті көлемді түзіліс анықталған. Ісік айқын ісінуді туындатып, ми құрылымдарын ығыстыра бастаған, бұл науқастың өміріне тікелей қауіп төндірген.
Науқас шұғыл түрде нейрохирургия бөліміне жатқызылды. Операцияны тәжірибелі нейрохирург Балхар Шатуев жүргізді.

«Түзілісті алып тастау нейромониторинг қолдана отырып, микрохирургиялық әдіспен жүргізілді. Бұл бізге мидың функцияларын нақты уақыт режимінде бақылап, барынша дәл әрекет етуге мүмкіндік береді», — деп атап өтті аурухана мамандары.

Күрделі операция үш сағатқа созылды. Хирургтарға өмірлік маңызды орталықтарды зақымдамай, түзілісті толық алып тастауға қол жеткізілді.
Отадан кейін оң динамика бірден байқалды. Науқастың бет бұлшықеттеріндегі әлсіздік жойылып (прозопопарез регрессиясы), ол қайтадан анық сөйлеп, ойларын еркін жеткізе бастады. Операциядан кейінгі екінші күні-ақ пациент өздігінен тұра алған.

Қымбат әрі жоғары технологиялы ем мен операция толығымен тегін жүргізілді — Әлеуметтік медициналық сақтандыру қоры (МӘМС) қаражаты есебінен.