Петропавлдағы Мүсірепов көшесіндегі аса қатыгездікпен болған кісі өлтіру оқиғасы
Резонанс тудырған қылмыстар әрдайым қоғамды дүр сілкіндіреді. Осындай қайғылы жайттардың бірі Петропавл қаласында Ғабит Мүсірепов көшесіндегі көпқабатты үйлердің бірінде болған. Бұл туралы QZ News редакциясына СҚО ПД музейінің бұрынғы меңгерушісі Любовь Осинская айтып берді.
Оқиға 2018 жылдың 18 ақпанында басталған. №13 «а» үйдің жанындағы қоқыс контейнерінен адамның дене қалдықтары табылған. Кейін №59 пәтерге жүргізілген тексеріс жедел қызметкерлерге сұмдық көріністі ашты: пәтер ішінен ер адамның дене бөлшектері және қылмыс құралдары – екі балта мен бес пышақ табылған.
Сот-медициналық сараптама өлім шамамен бір апта бұрын болғанын анықтаған. Алайда ішкі ағзалардың болмауына байланысты нақты өлім себебін белгілеу мүмкін болмады.
Қылмысқа марқұмның 56 жастағы бірге тұратын әйел серігі кінәлі болып шықты. Бұған дейін қылмыстық жауапкершілікке тартылмаған, өмірбаяны таза әйел екені анықталған. Іс материалдарына сәйкес, қаза тапқан ер адам жуас, науқас болған, ал әйел мінезі шәлкес, соңғы уақытта алкогольді шамадан тыс пайдаланған.
Любовь Осинскаяның айтуынша, қылмыс болған күні әйел таңертең ерте тұрып, таңғы ас дайындаған. Екеуі бірге тамақтанғаннан кейін, ол түскі ас әзірлеп, дүкенге бармақ болған. Қолына пышақ алып, асүйде балық тазалап жатқан кезде, есік жақтан бірге тұратын ер адам келген. Әйелдің айтуынша, ер адам оның кеткелі жатқанын ұнатпай, ұрсып, айқайлап, қолынан ұстаған. Әйел оны итеріп жібергенде, ол диванға құлаған. Қатты соққыдан басын қабырғаға ұрған болуы мүмкін. Ол ыңырсып, әйелдің шашынан тартып, басын шкафқа соққан. Әйел қатты ашуланып , үстел үстіндегі пышақты алып, ер адамның іш тұсына сұққан. Қанша рет пышақ сұққанын есіне түсіре алмаған. Кейін оның денесін залға сүйреп апарып, балконға шығарған. Ер адам ол кезде дем алмай жатқан. Неліктен «жедел жәрдем» не полиция шақырмағанын сотта түсіндіре алмаған. Мүмкін, қорқыныштан болуы ықтимал.
Үш күннен кейін әйел мәйітті бөлшектеуге кіріскен. Түн жамылып, айғақтардан жүйелі түрде құтылған. Қылмыстан кейін оның мінез-құлқынан ешкім күмән тудырарлық белгі байқамаған. Таныстарына бірге тұратын ер адамның кетіп қалғаны туралы жалған айтып, тіпті ұсталар алдында қонақта көңілді уақыт өткізгені анықталған.
Сот барысында айыпталушының адам өлтіруге ниеті тікелей болғаны дәлелденді: ол пышақ қолданып, жәбірленушінің кеуде тұсындағы өмірлік маңызды ағзаларына әдейі соққы жасаған.
2018 жылғы 28 наурыздағы №86 сот-психологиялық сараптама қорытындысына сәйкес, айыпталушы созылмалы психикалық аурумен ауырмайды, есі дұрыс деп танылған. Интеллектуалдық даму деңгейі қалыпты. Қылмыс жасаған сәтте физиологиялық аффект күйінде болмаған. Тергеу барысында ол әрекеттерін егжей-тегжейлі баяндап, есте сақтау қабілетінің бұзылмағаны анықталған.
Сот оның әрекетін басқа адамды қасақана өмірінен айыру, яғни адам өлтіру деп саралап, қылмыстық-атқару жүйесінің орташа қауіпсіздік мекемесінде өтеу үшін 10 жылға бас бостандығынан айыру жазасын тағайындады.