Ерлер колониясындағы сотталғандар Абай мұрасымен танысты
Петропавл қаласындағы №48 мекемеде жазасын өтеп жатқан сотталғандар қазақ әдебиетінің классикалық мұрасымен ерекше форматта танысу мүмкіндігіне ие болды – колония аумағында «Абайдың қара сөздері» атты театрландырылған қойылым ұсынылды. Ауқымды мәдени шараны Солтүстік Қазақстан облысының прокуратурасы мен облыстық Қылмыстық-атқару жүйесі департаменті бірлесіп ұйымдастырды. Шығармашылық жобаға қаладағы жетекші өнер ұжымдары қатысып, сахнада ұлы ойшылдың терең философиялық толғамдарын әсерлі жеткізді, деп хабарлайды QZ NEWS.
Колонияға өнер көрсету үшін А. Серы атындағы облыстық филармония мен С. Мұқанов атындағы қазақ сазды-драма театры әртістері келді. Қойылым арқылы шығармашылық ұжым Абай Құнанбайұлының «Қара сөздерінде» көрініс тапқан адамгершілік, адалдық, парасаттылық сынды құндылықтарды көрерменге жеткізді.
Мұндай іс-шаралар №48 мекемеде тұрақты түрде өткізіліп тұрады. Сотталғандардың өздері де шығармашылық қызметке белсенді қатысады. Олардың белсенділігі жазасын өтеу барысына оң әсер етеді. Бұл туралы тәрбие және әлеуметтік-психологиялық жұмыс бөлімінің басшысы Оксана Вышар мәлімдеді.
Оның айтуынша, осындай мәдени шаралар мінез-құлқының оң бағалануына мүмкіндік береді. Болашақта бұл шартты түрде мерзімінен бұрын босатуға өтініш беруіне немесе жазаның өтелмеген бөлігін неғұрлым жеңіл жаза түріне ауыстыруға ықпал етеді.
Армат К. есімді сотталған 2024 жылдың желтоқсан айынан бері осы колонияда жазасын өтеп келеді. Оның төрт жоғары білімі бар. Сондықтан ол мекеме кітапханасы базасында «Қызылжар» тарихи-әдеби клубын ұйымдастырған. Армат клуб мүшелеріне туған өлке тарихы мен отандық әдебиет туралы тұрақты түрде дәріс оқиды.
Оның айтуынша, клуб жұмысы өлкетану дәрістерінен басталған. Қатысушылар Сафуан Шаймерденов, Ғабит Мүсірепов, Сәбит Мұқанов, Иван Шухов шығармашылығын зерделеген. Сондай-ақ әлемге әйгілі тұлғалар – Абай Құнанбайұлы мен Александр Пушкин туралы да әңгімелер өткізіледі.
Бұдан бөлек, клубта викториналар, пікірсайыстар және зияткерлік ойындар жиі ұйымдастырылады. Олардың тақырыптары – адамгершілік және отбасылық құндылықтар, жасанды интеллект пен цифрландыру, алкоголизм мен нашақорлықтың алдын алу мәселелері. Армат дәрістерінде мемлекеттік және ұлттық мерекелердің маңызын атап өтіп, туған еліне деген мақтанышын жасырмайды.
Үйінде оны қарт ата-анасы, жары және үш баласы күтіп отыр. Армат уақытын тиімді пайдаланып, өзін-өзі жетілдіріп, білімін өзгелермен бөлісуде.