Петропавлда Құдайберген Қалиевтің «Толағай» кітабының тұсаукесері өтті
Елу жылға жуық еңбек, жауапкершілік пен қоғамға қызмет ету жолы «Толағай» атты жаңа кітаптың негізіне арқау болды. Облыс орталығында Қазақстанның еңбек сіңірген қызметкері Құдайберген Қалиевтің авторлығымен жарық көрген басылымның тұсаукесері өтті, деп хабарлайды QZ News тілшісі.
Кітапта автордың кәсіби қалыптасу жолы ғана емес, оның өмірлік құндылықтары мен жастар тәрбиесіне қатысты көзқарастары да баяндалған.
Құдайберген Қалиев еңбек жолын ауыл шаруашылығынан бастаған. Жас маман ретінде ол Тимирязев ауданына агроном болып барып, осы салаға жиырма жылдан астам уақытын арнады. Қызмет барысында өзін білікті маман әрі ұйымдастырушы ретінде танытып, кейін өңірлік деңгейдегі басшылық лауазымдарға тағайындалды.
1990-жылдардың басында Құдайберген Қалиев Солтүстік Қазақстан облысы әкімінің бірінші орынбасары болып тағайындалды. Бұл қызметте ол шамамен 10 жыл еңбек етті.
Автордың айтуынша, кітап жазу идеясы жинақталған тәжірибемен бөлісу және еңбектің қадірін көрсету ниетінен туған.
«Кітапта өзімнің өмір жолым мен еңбек қызметімді баяндадым. Жастарға табысқа табандылық, білім және өз ісіне деген сүйіспеншілік арқылы жетуге болатынын көрсеткім келді. Барлығын шынайы жазуға тырыстым, осы жылдары бастан өткергенім мен үйренгенімді жеткізуге күш салдым», – деді Қалиев.
Басылымды дайындауға автор шамамен сегіз ай уақыт жұмсаған. Кітапқа естеліктер, сұхбаттар, сондай-ақ тіл, мәдениет және өмірлік ұстанымдар туралы ой-толғамдар енгізілген. Жалпы таралымы – 300 дана. Солтүстік Қазақстан облысы Ардагерлер кеңесінің төрағасы Ескендер Елеусізовтың пікірінше, бұл кітап жас ұрпақ үшін маңызды бағыт-бағдар бола алады.
«Бұл басылымда автордың өмірлік тәжірибесі ғана емес, жастарға дұрыс жол таңдауға, білікті маман әрі құрметті азамат болуға көмектесетін ақыл-кеңестер де жинақталған», – деді ардагер.
Құдайберген Қалиевтің айтуынша, кітап отбасы тарихының бір бөлігіне айналып, балалар мен немерелеріне, шөберелеріне ата-бабаларының жүріп өткен жолын таныстырып, өз жетістіктеріне ұмтылуға жігер береді.