СҚО әкімі республикалық олимпиадаларда жеңіске жеткен 33 оқушыға ақшалай сыйақылар мен білім гранттарын табыстады

Солтүстік Қазақстан облысында оқу жылы барысында өңір намысын республикалық және халықаралық олимпиадаларда, сондай-ақ ғылыми жобалар байқауларында абыроймен қорғаған оқушылар марапатталды, деп хабарлайды QZ NEWS тілшісі.

Дарынды жастармен салтанатты кездесу Сәбит Мұқанов атындағы қазақ сазды-драма театрында өтті.

Лайықты марапаттарын алмас бұрын оқушылар облыс әкімі Ғауез Нұрмұхамбетовке өздерінің ғылыми зерттеулері мен жобаларын таныстырды. Ұсынылған жұмыстардың қатарында жасанды интеллект, цифрлық технологиялар, инженерия, лингвистика, туризм және өлкетану салаларындағы бастамалар болды. Бұл жобалардың көпшілігі беделді зияткерлік байқауларда жоғары бағасын алған.

Оқушыларға арнаған сөзінде облыс әкімі бүгінгі жас ұрпақтың басты міндеті білімге ұмтылу, үнемі даму және алдына биік мақсаттар қоя білуде екенін атап өтті. Оның айтуынша, білім мен табандылық болашақтағы кәсіби жетістіктердің негізін қалыптастырып, жастарға өз мүмкіндіктерін жүзеге асыру үшін кең жол ашады.

«Бұл залда бүкіл облыс мақтан тұтатын жастар жиналып отыр. Әрбір жетістіктің артында қажырлы еңбек, табандылық, тыңғылықты дайындық және білімге деген шынайы қызығушылық жатыр. Бүгін ұсынылған жобалардың өзектілігі мен сапасы жоғары деңгейде», – деді Ғауез Нұрмұхамбетов.

Әсіресе Айыртау ауданының оқушыларына ерекше құрмет көрсетілді. «Үздік ауыл оқушысы» атағына орыс тілі пәні бойынша екі олимпиаданың абсолютті жеңімпазы атанған Евгения Козлова пен ағылшын тілі олимпиадаларында жоғары нәтиже көрсеткен Артем Коринец ие болды.

Сондай-ақ өңір басшысы салтанатты шараның ең жас қатысушысы – «Білім-инновация» облыстық мамандандырылған лицей-интернатының 8-сынып оқушысы Аңсар Төлегенді ерекше атап өтті. Жасына қарамастан, ол жоғары сынып оқушыларына арналған тапсырмаларды орындап, республикалық олимпиадада табысты өнер көрсетті.

Жас зияткерлердің ұстаздары да назардан тыс қалмады. Облыс әкімі оқушылардың жетістіктері педагогтердің еңбегі мен ата-аналардың қолдауының арқасында мүмкін болғанын атап өтті. Алғыс белгісі ретінде дарынды оқушылардың отбасыларына арнайы алғыс хаттар жолданатын болады.

Кездесудің басты кейіпкерлерінің бірі Аңсар Төлеген болды. Оның айтуынша, ол небәрі бір айдың ішінде 10-сынып бағдарламасын өз бетінше меңгеріп, республикалық олимпиадада бағын сынап көруге шешім қабылдаған. Байқауда оған 40-тан астам қатысушы бәсекелес болған.

Оқушының сөзінше, қола медальмен қатар олимпиада оған ұмытылмас әсерлер мен жаңа достар сыйлаған.

«Бұл мен үшін өте қызықты тәжірибе болды. Күрделі тапсырмалар, еліміздің әр өңірінен келген құрдастарыммен танысу, Қазақстан бойынша сапарлар ерекше есте қалды. Мұның бәрі жадымда ұзақ сақталады. Маған әрдайым қолдау көрсеткен тәлімгерім Гүлден Қуанышбекқызы Мұратоваға үлкен алғысымды білдіремін», – деді Ансар.

«Қызылжар дарыны» дарынды балалар мен талантты жастарды анықтау және қолдау орталығының директоры Бақыт Ғабдуллинаның айтуынша, биыл облыс әкімінің ақшалай сыйақыларымен 33 оқушы марапатталған. Олардың қатарында ауыл мектептерінің, мамандандырылған білім беру ұйымдарының және Петропавл қаласы мектептерінің оқушылары бар.

Сонымен қатар 14 жоғары сынып оқушысына Kozybayev University университетінің білім гранттары табысталды.