СҚО-да Хия Ерденова жас медицина мамандарымен өз тәжірибесімен бөлісуде
Жоғары санатты дәрігер Хия Завихулқызы Ерденова 40 жылдан астам уақыт бойы науқастардың денсаулығын сақтауға және жүйке жүйесі ауруларымен күресуге көмектесіп келеді, деп хабарлайды QZ NEWS тілшісі.
Соңғы жиырма жылда ол 20 жыл бұрын ашылған №1 қалалық аурухананың неврология бөлімшесін басқарып келеді. Бүгінде бөлімше өңір тұрғындарына мамандандырылған медициналық көмек көрсетуді жалғастыруда.
Бөлімшеде орталық жүйке жүйесінің түрлі патологиялары, тірек-қимыл аппараты аурулары және басқа да неврологиялық бұзылыстары бар науқастар ем қабылдайды. Көп жылғы еңбек өтіліне қарамастан, Хия Завихулқызы әрбір науқасқа ерекше көңіл бөліп, өз мамандығын өмірінің басты ісі деп санайды.
«Бала кезімнен анамның жиі ауыратынын көріп өстім. Сол кезде-ақ өмірімді медицинамен байланыстыру туралы ой пайда болды. Институтты бітіргеннен кейін невропатолог болуды таңдадым. Біздің бөлімше тұрақты жұмыс істейді, күрделі мәселелер жоқ. Барлық міндеттерді сапалы орындап, пациенттерге жоғары деңгейде көмек көрсетуге тырысамыз», – дейді Хия Ерденова.
Жылдар бойы ол тәжірибелі дәрігер ғана емес, жас әріптестеріне тәлімгер де бола білді. Солардың бірі – бөлімшеде төрт жылдан бері еңбек етіп жүрген дәрігер-невролог Есбол Арапатов. Оның айтуынша, кәсіби жолының алғашқы қадамдарын жасауға дәл Хия Завихулқызы көмектескен.
«Кәсіби еңбек жолымның басында Хия Завихулқызы маған мықты негіз қалыптастырды. Диагнозды дұрыс қоюды, күрделі жағдайларда шешім қабылдауды, науқастармен қарым-қатынас жасауды үйретті. Қажет кезде қатал бола алады, бірақ әрдайым әділ және көмектесуге дайын. Басшы ретінде талапшыл, бізді үнемі сапалы жұмыс пен нақты нәтижеге бағыттайды», – дейді Есбол Арапатов.
Хия Ерденованың пікірінше, нағыз дәрігер мамандыққа жүрек қалауымен келуі керек. Ол адамдарға шынайы көмектесуге деген ұмтылыс пен өз ісіне адалдық медицинадағы ұзақ жылдық еңбектің негізі деп есептейді.
«Мен бұл жолды өзім таңдадым және ешқашан өкінген емеспін. Осы уақытқа дейін мамандығымды ауыстырғым келген жоқ. Нағыз дәрігерлер медицинаға шақырумен келеді. Ешқандай материалдық фактор өз ісіне деген сүйіспеншілікті алмастыра алмайды. Жақсы маман терең білімге ие болып қана қоймай, мейірімді, жанашыр әрі әрдайым адамға көмек көрсетуге дайын болуы керек», – деп атап өтті бөлімше меңгерушісі.
№1 қалалық аурухананың неврология бөлімшесі 55 науқасқа арналған. Мұнда үш дәрігер қызмет етеді. Ұжым әлі де әртүрлі бағыттағы жас мамандардың келуін күтуде. Олар өз өмірін ең жауапты мамандықтардың біріне арнауға дайын болуы тиіс.