Шілде айының соңында СҚО-да +36 градусқа дейінгі аптап ыстық, найзағай мен бұршақ күтіледі

Шілде айының соңғы аптасында Солтүстік Қазақстан облысында нағыз жазғы ауа райы орнайды. 27 шілдеден бастап ауа температурасы +30 градустан асып, өңірде аптап ыстықпен қатар найзағай, екпінді жел және кей жерлерде бұршақ күтіледі, деп хабарлайды QZ NEWS тілшісі.

«Қазгидромет» РМК мәліметінше, 27 шілдеде ауа температурасы +30…+35 градусқа дейін көтеріледі. Облыстың солтүстігі мен шығысында жаңбыр жауып, найзағай ойнайды. Күндіз кей жерлерде бұршақ жауып, желдің екпіні күшеюі мүмкін. Солтүстіктен соққан желдің жылдамдығы секундына 9–14 метр болса, найзағай кезінде екпіні 15–20 м/с-қа дейін жетеді. Түнде ауа температурасы +13…+18 градус шамасында болады.

Аптап ыстық алдағы күндері де сақталады. 28–31 шілде аралығында күндіз ауа температурасы +31…+36 градусқа дейін жоғарылайды, ал түнгі температура +15…+22 градусқа дейін жылынады. Сонымен қатар, облыстың солтүстігі мен шығысында күн сайын дерлік өткінші жаңбыр, найзағай, кей жерлерде бұршақ және екпінді жел болжанып отыр. 29 шілдеге дейін жел солтүстік бағыттан соғады, ал 30 шілдеден бастап оңтүстік-батыс бағытқа ауысады. Желдің жылдамдығында айтарлықтай өзгеріс болмайды.

Осылайша, шілде айының соңы құбылмалы ауа райымен ерекшеленбек: аптап ыстықтың орнын найзағайлы атмосфералық фронттар басады. Сондықтан сапарға шығуды, табиғат аясында демалуды немесе егіс алқаптарында жұмыс істеуді жоспарлаған тұрғындарға ауа райы болжамын мұқият қадағалау ұсынылады. Найзағай кезінде ашық жерде жүрмеуге, жалғыз тұрған ағаштың түбіне паналамауға кеңес беріледі. Ал күннің ең ыстық уақытында ұзақ уақыт күн астында болмауға, сұйықтықты жеткілікті мөлшерде ішіп, ауыр дене еңбегін таңертеңгі немесе кешкі уақытқа ауыстырған жөн.