Ақтаулық суретшілер Солтүстік Қазақстанға сәндік сылақ пен тастарды пайдаланып жасалған бірегей картиналарын әкелді
«Абылай хан резиденциясы» музей кешенінде ақтаулық суретшілер Инна Ермакова мен Әсел Мұрзағалиеваның көрмесі ашылды. Олар авторлық техникамен салынған 12 картинаны және көлемі 4х2 метр болатын бір монументалды туындыны ұсынды, деп хабарлайды QZ NEWS тілшісі.
Инна Ермакова мен Әсел Мұрзағалиева сегіз жылға жуық уақыттан бері шығармашылық тандемде жұмыс істеп келеді. Олардың картиналары сәндік сылақтың көмегімен жасалады. Бұл материал бейнелерге көлем мен бедер береді. Кейін суретшілер туындыларын әшекей бұйымдармен, тастармен, кейде күміспен және флуоресцентті бояулармен толықтырады. Соның арқасында ультракүлгін сәуленің астында қараңғыда картиналардағы қосымша бөлшектер жандана түседі. Мәселен, лаулаған киіз үй, будақтаған түтін мен айдың бейнесі ерекше көрінеді.
«Көрменің негізгі туындысы – «100 тұлға» композициясы. Онда Шыңғыс ханнан бастап бүгінгі замандастарымызға дейінгі тарихи және мәдени қайраткерлердің, соғыс батырларының, ғылым мен өнер өкілдерінің портреттері жинақталған. Жұмысымыз жыл сайын толықтырылып отырады. Барлығын қамтуға тырысамыз. Бұл жолы жүз тұлғаны бейнеледік», – деді Инна Ермакова.
Суретшілер ұлттық нақыш пен әйел тақырыбына да ерекше мән береді. Картиналардың бірінде әйелдердің, балалар мен жануарлардың қамқоршысы саналатын түркілердің Ұмай анасы бейнеленген. Оның мүсіні мен киіміне бірнеше қабат сылақ жағылып, көлемді пішін жасалған. Туынды асыл тастармен және әшекей бұйымдармен безендірілген.
Авторлар шабытты күнделікті өмір мен тарихтан алады. Олар жүз жыл бұрын түсірілген қазақтардың ескі ақ-қара фотосуреттеріне сүйенеді. Сонымен қатар қарапайым адамдардың бейнесінен де әсер алады. Мәселен, Наурыз мерекесінде көздеріне түскен әжені немесе студияларының жанынан немересімен бірге жиі өтіп жүретін қарияны картиналарына арқау етеді.
Кейбір туындылардың жақтаулары ескі кілемдерден жасалады. Осылайша, кілемдерге екінші өмір сыйланып, картиналарды «көшпенділерше» ыңғайлы тасымалдауға мүмкіндік туады.
Суретшілер өз туындыларымен жиі саяхаттайды. Қазақстанның Атбасар, Көкшетау, Бурабай сияқты өңірлерінде көрмелерін өткізген. Былтыр көшпенділер ойындарына орай Қытайға да барған. Петропавлдан кейін Астанаға жол тартпақ.
Музейдің тарих бөлімінің меңгерушісі Бауыржан Жүнісовтің айтуынша, суретшілердің туындылары ерекше әсер қалдырады әрі көрермендер арасында сұранысқа ие.
Көрме жексенбіге дейін жалғасады.