Петропавлда NIS-тің үздік баскетбол командалары анықталды
Петропавлдағы Назарбаев Зияткерлік мектебінің спорт залында үш күн бойы ысқырық үні, доптың тарсылы мен жанкүйерлердің қолдауы толастамады. Мұнда Петропавл, Астана және Көкшетау қалаларының жас спортшыларын біріктірген желілік спартакиаданың баскетболдан өңірлік кезеңі өтті. Жеңіс үшін ұлдар мен қыздар командалары бақ сынады. Қатысушылар үшін басты сынақ тек қарсыластармен күрес емес, өз сабырын сақтай білу де болды. Жарыс «Бір алаң. Бір команда. Бір жеңіс!» ұранымен өтті, деп хабарлайды QZ NEWS тілшісі.
Турнир тартысқа толы болды. Ұлдар арасында бес команда, қыздар арасында төрт команда бақ сынады. Ойындар айналмалы жүйе бойынша өткізілді. Сондықтан көшбасшылар қатарына кездейсоқ қосылу мүмкіндігі аз болды: әр команда барлық қарсыласымен кездесуі керек. Мұнда бір матчта жеңіске жетіп, турнирдің соңғы ысқырығын тыныш күтуге болмайды. Үш күн бойы қарқынды сақтап, тұрақты ойын көрсету қажет.
Әсіресе Петропавл мен Астана Нұра командалары арасындағы кездесу ерекше тартысты өтті. Екі команда да алғашқы ойындардан-ақ жеңіске деген нық ниетін көрсетті. Алаңда нағыз спорттық текетірес өрбіді: шабуылға жылдам ауысу, допқа таласу, дәл пас беру және бастаманы өз қолына алуға ұмтылу. Кейде ойын сәтінің тағдырын санаулы секундтар шешіп отырды.
Жас спортшылар үшін мұндай жарыстар — командалық бірлікті сынайтын мүмкіндік. Баскетболда жеке шеберлікке ие болу жеткіліксіз. Допты жақсы меңгерген ойыншының өзі әріптестерінің қолдауынсыз алысқа бара алмайды. Мұнда бір-біріне сену, дер кезінде көмекке келу және сәтсіз лақтырудан кейін де жігерді жоғалтпау маңызды.
Нәтижесінде ұлдар арасында NIS Астана Нұра командасы үздік атанды. Күміс жүлде алаң иелері — NIS Петропавл баскетболшыларына бұйырды. Ал үшінші орынды Astana IB командасы иеленді.
Қыздар арасында NIS Петропавл құрамасы жеңіс тұғырынан көрінді. Екінші орынды NIS Астана Нұра командасы, үшінші орынды NIS Көкшетау құрамасы еншіледі.
Петропавлдық спортшылар үшін турнирдің қорытындысы ерекше қуанышты болды: қыздар ең биік тұғырға көтерілсе, ұлдар мектеп қоржынын күміс жүлдемен толықтырды.