Петропавлда 2026 жылғы егіс науқанының стратегиясы талқыланды
Солтүстік Қазақстан облысы елдің агроөнеркәсіп саласындағы технологиялық көшбасшы мәртебесін тағы да растады. Петропавлда ҚР Ауыл шаруашылығы вице-министрі Аманғали Бердалин мен облыс әкімі Ғауез Нұрмұхамбетовтің қатысуымен дәстүрлі ауқымды семинар-кеңес өтті, деп хабарлайды QZ NEWS тілшісі.
Кездесудің басты тақырыптары – егіс алқаптарын цифрлық трансформациялау және жасанды интеллектіні енгізу болды. Іс-шара Мемлекет басшысының агроөнеркәсіп кешенін жоғары технологиялы салаға айналдыру жөніндегі бастамаларын іске асыру аясында ұйымдастырылды.
Өз сөзінде Ауыл шаруашылығы вице-министрі Аманғали Бердалин агроөнеркәсіп кешенін дамыту маңыздылығына ерекше тоқталды.
«Мемлекет басшысы Қасым-Жомарт Тоқаев агроөнеркәсіп кешені экономиканың жоғары технологиялы әрі бәсекеге қабілетті саласына айналуы тиіс екенін бірнеше рет атап өтті. Осыған байланысты заманауи агротехнологияларды енгізу, цифрландыру және өндіріс тиімділігін арттыру мәселелері ерекше өзектілікке ие», — деді ол.
Қазіргі таңда Солтүстік Қазақстан облысы ауыл шаруашылығы саласында республика бойынша көшбасшы өңірлердің қатарында. Тек 2025 жылдың өзінде ауыл шаруашылығы өнімдерінің көлемі шамамен 1,1 триллион теңгені құрады.
«Соңғы жылдары жүйелі мемлекеттік қолдаудың, заманауи технологияларды енгізудің және ғылыммен тығыз байланыстың арқасында өңірдің аграрлық секторы тұрақты өсім мен тиімділіктің артуын көрсетіп келеді. Мәселен, 2025 жылы облыс диқандары 6,6 млн тонна астық және 1,3 млн тонна майлы дақыл жинап, жоғары нәтижелерге қол жеткізді», — деді СҚО әкімі Ғауез Нұрмұхамбетов.
Өңір басшысы сондай-ақ биылғы негізгі міндеттердің қатарында егіс алқаптарын әртараптандыру, жоғары маржалы дақылдарды ұлғайту және заманауи, соның ішінде ылғал үнемдеу технологияларын енгізу бар екенін атап өтті.
«Ауыл шаруашылығын дамытудағы тұрақты нәтижелер ғылым, бизнес және мемлекет арасындағы үйлесімді жұмыстың арқасында ғана мүмкін. Алдыңғы қатарлы шаруашылықтардың тәжірибесі мен заманауи ғылыми әзірлемелер басқарушылық шешімдер мен тиімді тәжірибелерді енгізудің негізі болуы тиіс. Сондықтан бұл білімді практикада кеңінен қолдану және оны салаға енгізу үшін жағдай жасау қажет», — деді өңір басшысы.
2026 жылы егіс алқаптарының жалпы көлемі 4,3 млн гектардан асады. Әртараптандыру аясында дәнді дақылдар көлемі 2,9 млн гектарға дейін қысқартылып, майлы дақылдар 1 млн гектарға дейін, ал мал азықтық дақылдар 405 мың гектарға дейін ұлғайтылды. Ылғал үнемдеу технологиялары қолданылатын алқап көлемі 13 мың гектардан асады.
Саланы дамыту бойынша жұмыстар жалғасуда: шамамен 400 мың тонна минералды тыңайтқыш енгізу жоспарланып отыр, органикалық тыңайтқыштарды қолдану да кеңейтілуде.
Егіс науқанына 10 мыңнан астам трактор, 14 мыңға жуық сепкіш және 1,5 мың заманауи егіс кешені жұмылдырылады.
«Бұрын егіс алқаптарында ескі техникалар жұмыс істесе, бүгінде олардың орнын жайлы, цифрлық, жоғары өнімді техникалар басты. Бұл ауыл шаруашылығын жүргізу тәсілдерін түбегейлі өзгертуде», — деді облыс әкімі.
Мемлекеттік қолдау мен ерте қаржыландырудың арқасында аграршылар егіс науқанына алдын ала дайындалуға мүмкіндік алды. «Кең Дала» бағдарламасы аясында 63,5 млрд теңге бөлініп, техниканы жаңартуға 49 млрд теңге қарастырылған.