«SENSITIVE» би театры «Astana Ballet» сахнасында «Ботай» этно-пластикалық қойылымын қойды

Астанадағы «Astana Ballet» театрында «Ботай» спектаклінің премьерасы өтті. Қойылым Солтүстік Қазақстандық бірегей «SENSITIVE» ұжымының 20 жылдығына арналды. Салтанатты іс-шараға «Samruk-Kazyna Trust» қорының бас директоры Альфия Адиева қатысты. Ол әртістерді мерейтойымен құттықтап, олардың ел мәдениетіне қосқан үлесінің маңызын атап өтті, деп хабарлайды QZ NEWS тілшісі.

«SENSITIVE» театры Ольга Ростовщикова басшылығымен есту қабілеті шектеулі әртістерді біріктіреді. Бүгінде ұжым халықаралық деңгейдегі шығармашылық бренд ретінде танылған. Бұл жетістік Солтүстік Қазақстан облысының мәдени дамуы және Петропавлдың дарынды жастарына жүйелі қолдау көрсетілуімен тікелей байланысты.

Мұндай бастамаларды жүзеге асырудағы негізгі алаңдардың бірі — Qyzyljar Creative Center. Бұл хаб 2024 жылы Мемлекет басшысының тапсырмасымен ашылған. Жалпы аумағы 2000 шаршы метрден асатын креативті кеңістік бұрынғы С. Мұқанов атындағы қазақ театрының тарихи ғимаратына жаңа тыныс берді. Қазіргі таңда орталық жергілікті креаторлардың толық жұмыс циклін қамтамасыз етеді.

Мерейтойлық жоба «Samruk-Kazyna Trust» қорының қолдауымен жүзеге асырылды. Бұл қор — «Самұрық-Қазына» АҚ компаниялар тобының бірыңғай қайырымдылық операторы. Петропавл креатив орталығының резиденттері қазірдің өзінде IT, сән және музыка салаларында 100-ден астам стартапты іске қосты. Олардың бірқатар жобалары халықаралық деңгейде мойындалған.