2026 жылы мобильді аударымдарды бақылау: қазақстандықтар нені білуі керек
2026 жылғы 1 қаңтардан бастап Қазақстанда мобильді аударымдарды бақылаудың жаңартылған тәртібі күшіне енеді. Мемлекеттік кірістер комитеті (МКК) жеке тұлғалардың банк шоттарындағы операцияларды қадағалау үшін қолданылатын түпкілікті өлшемшарттарды бекітті, деп хабарлайды QZ NEWS «NewTimes.kz» ақпарат агенттігіне сілтеме жасап.
Бұған дейін аударымды кәсіпкерлік қызметтен түскен табыс деп тану үшін тек түсімдердің саны ескерілетін: егер үш ай қатарынан 100 және одан да көп түрлі адамнан ақша түссе, операция күмәнді деп саналатын. Жаңа редакция бұл өлшемшартты қаржылық шекпен толықтырды: енді үш айдағы аударымдардың жалпы сомасы ең төменгі жалақының 12 еселенген мөлшерінен, яғни 1 020 000 теңгеден (ең төменгі жалақы 85 000 теңге болған жағдайда) асуы тиіс.
МКК мобильді аударымдарды қадағалау кезінде назар аударатын негізгі өлшемшарттар:
- бір жеке тұлғаның үш ай қатарынан әр айда 100 және одан да көп түрлі адамнан ақша алуы;
- осы кезеңдегі түсімдердің жалпы сомасы 1 020 000 теңгеден асуы;
- қаражаттың кәсіпкерлік қызметке арналмаған шотқа түсуі.
Жаңа талаптарға сәйкес, МКК жеке шоттарға түсетін ірі әрі тұрақты аударымдарды, тіпті азамат ресми түрде кәсіпкерлікпен айналыспаса да, мұқият бақылауға алады. Көп адамнан ақша алатын немесе қомақты сома түсетін азаматтарға салық органдары тарапынан сұрақтар туындамас үшін бұл талаптарды алдын ала ескергені жөн.