Мемлекет басшысы қыз алып қашу туралы: «Мұндай қатыгездікке ешқандай жағдайда жол беруге болмайды»
Қызылорда қаласында өткен Ұлттық құрылтай отырысында Президент әйелдерді некеге тұру мақсатында ұрлау мәселесі сияқты өткір әлеуметтік проблеманы көтерді, деп хабарлайды QZ News тілшісі.
Қасым-Жомарт Тоқаев мұны жабайы қылмыс деп атады.
«Бұл – ұлтымыздың беделіне нұқсан келтіретін өрескел әрі жабайы қылмыс. Мұндай қатыгездікке ешқандай жағдайда жол беруге болмайды. Жыл өткен сайын қоғамдық сана өсіп, азаматтық жауапкершілік деңгейі артып келеді. Заңнамалық өзгерістер де осыған сай болуы тиіс», – деді Қазақстан Республикасының Президенті.
Президент мемлекеттің дәстүрлі мәдени құндылықтарды қорғап, азғын мінез-құлық үлгілерін насихаттауға қарсы тұруы керектігін атап өтті. Қазақстанда неке институтын ер мен әйелдің ерікті одағы ретінде заңнамалық тұрғыда нығайту қажет екенін жеткізді.