Қасым-Жомарт Тоқаев жасанды интеллектті Қазақстан дамуының басым бағыты деп жариялады
Президент Қасым-Жомарт Тоқаев Turkistan газетіне берген сұхбатында Қазақстан цифрлық державаға айналуы тиіс екенін атап өтті. Оның айтуынша, бұл – жаңа технологиялық дәуірде өркениетті ел ретінде сақталып қалудың жалпы өмірлік маңызы бар мәселесі, деп хабарлайды QZ NEWS.
Мемлекет басшысы халқымыз менталдық тұрғыдан мұндай инновацияларды қабылдауға дайын екенін айтты. Оның үстіне, Қазақстанда адамдардың өмір сүру салты мен тұрмыс-тіршілігін айтарлықтай өзгерткен белгілі финтех-компаниялар табысты жұмыс істеп келеді.
«Қазіргі таңда әлемде АҚШ пен Қытай – екі ірі технологиялық держава арасында қатаң бәсекелестік жүріп жатыр. АҚШ президенті елдің үстемдігін нығайтуға бағытталған арнайы бағдарламаның іске қосылатынын жариялады. Ал Қытай мұны ұлттық абырой мәселесі деп санап, шегінер емес – онда жасанды интеллект саласымен айналысатын шамамен бес мың компания жұмыс істеп жатыр. Басқа дамыған мемлекеттер де бұл бағытта тоқтап қалған жоқ», – деді Президент сұхбатында.
Ол Қазақстанның да экономика мен қоғамдық өмірге жасанды интеллектіні енгізуге басымдық бергенін атап өтті.
«Біздің бастапқы мүмкіндіктеріміз жаман емес. Мемлекеттік қызметтерді цифрландыру, финтех және экономиканың бірқатар салаларында жетістіктеріміз бар. IT-стартаптарды қолдауға арналған толыққанды экожүйе тиімді жұмыс істеуде, екі мың компанияны біріктірген Astana Hub инновациялық кластері қызмет атқарып жатыр. 2025 жылы IT-қызметтер экспорты шамамен бір миллиард долларды құрады. Цифрлық активтерге арналған CryptoCity пилоттық аймағы құрылуда. Жедел дамитын Alatau city қаласының құрылысы басталуда. Мемлекеттік деректерді жинақтау және талдау жұмыстары қарқын алуда, мамандардың пікірінше, бұл – алдағы дәуірдің жаңа алтыны», – деді Қасым-Жомарт Тоқаев.
Өткен жылдың мамыр айында елімізде жетекші халықаралық және отандық сарапшылардың қатысуымен Жасанды интеллектті дамыту жөніндегі кеңес жұмысын бастады. Қараша айында «Жасанды интеллект туралы» заңға қол қойылып, ол жақын арада күшіне енеді. Сондай-ақ Жасанды интеллект және цифрлық даму министрлігі құрылды. Қазақстанда Alem.Cloud және Al-Farabium атты екі суперкомпьютер іске қосылды, ал Астана қаласының әкімдігі танымал эмираттық компаниямен бірлесіп жеке платформа құрды.
«Салалық кадрларды даярлау үшін мектептер мен университеттер деңгейінде білім беру бағдарламалары жүзеге асырылуда. Мәселен, AI-Sana бағдарламасы аясында 650 мыңнан астам студент оқытудан өтті. Жақын уақытта мамандандырылған зерттеу бағытындағы жасанды интеллект университеті ашылады. Жасанды интеллекттің пайда болуымен болашаққа қадам басып үлгеретін елдер мен артта қалып қоятын елдер арасында өзіндік шекара пайда болды. Сондықтан мен цифрлық технологиялар мен жасанды интеллектті Қазақстан дамуының басым бағыты деп жарияладым. Биылғы жыл шешуші болады. Басталған аса маңызды істің табысты боларына сенемін», – деп түйіндеді Қазақстан Президенті.