Қазақстан Президенті жаңа салық реформасының мәнін түсіндірді
Жаңа Салық кодексіне қатысты пікірталастар халық арасында үрей тудырмауы тиіс. Мемлекет басшысы Қасым-Жомарт Тоқаев Turkistan газетіне берген сұхбатында фискалдық жүйені жаңғырту жай ғана қаржы жинау емес, әділетті қоғамға бастайтын жол екенін түсіндірді, деп хабарлайды QZ News тілшісі.
Қазақстан Президенті салық реформасы тақырыбы өзекті екенін, бұл мәселе бойынша пікірталастардың орынды екенін атап өтті. Алайда олардың азаматтар арасында дүрбелең туғызатындай деңгейге жетпеуі қажет екенін айтты.
«Мұндай реформалар көптеген елдерде жүргізілуде. Мәселен, Ресейде жақында қосылған құн салығы 22 пайызға дейін көтерілді. Біздің реформамыз – кезекті “фискалдық науқан” емес, салық жүйесін қайта жаңғырту. Оның басты мақсаты – тұрақты экономикалық өсімді қамтамасыз ету. Үкіметке ашық әрі түсінікті Салық кодексін дайындау тапсырылды. Министрлер кабинеті бұл міндетті қалай атқарғанын биыл-ақ көретін боламыз», – деді Мемлекет басшысы.
Қасым-Жомарт Тоқаевтың айтуынша, қосылған құн салығын 20 пайызға дейін арттыруды алдыңғы Үкімет ұсынған, ол фискалдық саясатта жіберілген қателіктерді ескере отырып, мұндай шешімнің аса қажетті екенін мойындаған.
«Талқылау барысында қазіргі Үкімет те ҚҚС-ты 20 пайызға дейін көтеруді ұсынды, алайда мен оған бұл көрсеткішті төрт пайыздық тармаққа төмендетуді тапсырдым. Жаңа Салық кодексі бақылаудан серіктестікке көшуге бағытталған, яғни барлық қатысушылар – мемлекет, бизнес және азаматтар – өз міндеттемелерін адал орындайтын жүйе қалыптастыруды көздейді. Осындай өзара толықтыратын жүйеде салық ауыртпалық ретінде қабылданбайды. Бұл – мәні жағынан заманауи қоғамдық келісім. Салық төлейсің – қызмет, инфрақұрылым, қауіпсіздік пен мүмкіндіктер аласың. Бұдан да кеңірек айтсақ, бұл – жүктемені әділ қайта бөлудің құралы, әлсіздерді қолдаудың және экономиканың “ортасында” тұрғандарды нығайтудың жолы», – деді Қазақстан Президенті.
Сондай-ақ ол фискалдық саясаттың тиімділігі бүкіл әлемде басқару сапасына ғана емес, қоғамның салықтық сауаттылығы мен саналы ұстанымына да байланысты екенін атап өтті.
«Осылайша салық төлеу мәдениеті қалыптасады: ол міндеттен заманауи патриотизмнің бір түріне айналады. Ал бұл өз кезегінде жемқорлықты қабылдамауға тікелей жол ашады. Адал салық төлеушілер өз қаражатының алаяқтардың қалтасына кетуін мүлде қаламайды», – деді Мемлекет басшысы.