Қазақстанның «прайм-дәуірі»: Қасым-Жомарт Тоқаев жастарды виртуалды иллюзиялардан гөрі еңбекті таңдауға шақырды

Turkistan газетіне берген сұхбаты барысында журналист Қазақстанның белгілі бір «прайм-дәуірі» туралы Президенттің пікірін сұрады. Бұл тіркес әлеуметтік желілерде кеңінен тараған. Сұраққа жауап берген Қасым-Жомарт Тоқаев қазақстандық жастар туралы өз көзқарасын білдірді, деп хабарлайды QZ News тілшісі.

Мемлекет басшысы жас ұрпақ үмітке, қуат пен оптимизмге толы екенін атап өтті. Сондай-ақ қазіргі жастарға «азаматтық бірегейліктің айқын сезімі» тән екенін айтты.

«Олар бар ықыласымен болашаққа ұмтылатын отаншыл азаматтар. Дәл осындай өршіл ұстанымның арқасында еліміз талай рет алдынан шығатын сын-қатерлерді еңсеріп, қиындықтарды жеңері сөзсіз», – деді ҚР Президенті сұхбатында.

Қасым-Жомарт Тоқаев қоғамымызға тән «жасампаз психология» бар екенін мәлімдеді. Бұл жастардың бойындағы жігер мен Отанға деген ізгі ниеттен көрініс табады.

«Жастардың қуанышы орынсыз, тіпті оғаш көрінуі мүмкін. Бірақ олардың ой-пікірімен санасқан жөн. Жастар Отанымызға тек жақсылық тілейді. Бұл біздің қоғамымыздың жасампаздық рухын білдіреді», – деп атап өтті ол.

Президент жастарды жеңіл әрі тез жететін жеңістерге ұмтылмай, еңбексүйгіштік пен тәртіпке дағдылануға шақырды.

«Өскелең ұрпақ бүгінгі ахуалға арман-қиялмен емес, нақты көзқараспен қарауы қажет, виртуалды емес шынайы әлемде өмір сүруі керек. Ауырдың үстімен, жеңілдің астымен жүрмей, ерінбей еңбек етіп, өзін темірдей тәртіпке тәрбиелей білгені жөн », – деді Мемлекет басшысы.