Мамлют ауданында құтқарушылар халықаралық автобустың 18 жолаушысын эвакуациялады

Солтүстік Қазақстан облысында ТЖМ қызметкерлері «Түмен – Шымкент» бағытымен жүрген рейстік автобустың жолаушыларына көмек көрсетті. Техникалық ақауға байланысты көлік «Мамлютка – Қостанай» тасжолында, Покровка ауылынан бір шақырым жерде тоқтап қалған, деп хабарлайды QZ News тілшісі.

Қатты аяз жағдайында қозғалысты жалғастыру мүмкін болмай, адамдардың өмірі үшін қауіпті еді. Оқиға орнына СҚО ТЖД күштері жедел
түрде жіберілді.

«Құтқарушылардың күшімен Өзбекстан Республикасының азаматтары болып табылатын 18 жолаушы эвакуацияланды. Олардың барлығы жақын маңдағы жылыну пунктіне жеткізілді», – деп хабарлады ведомствоның баспасөз қызметі.

ТЖМ қызметкерлерінің жедел әрекетінің арқасында зардап шеккендер жоқ. Барлық эвакуацияланған азаматтар жылумен және қажетті жағдайлармен қамтамасыз етілді.