Қар құрсауы мен температураның күрт ауытқуы: ақпанның соңғы аптасында солтүстікқазақстандықтарды қандай ауа райы күтіп тұр

Солтүстік Қазақстан облысында күрделі метеорологиялық жағдай қалыптасады. Қазгидромет мәліметінше, өңірде алдымен қатты боран мен дауылды жел соғып, кейін арктикалық суық ауа массасының күрт енуі күтіледі, деп хабарлайды QZ NEWS.

22 ақпанда қар мен боран сақталады, күндіз облыстың батысы мен солтүстігінде қатты қар жауады деп болжануда. Кей жерлерде тұман күтіледі. Оңтүстік-шығыстан соғатын желдің жылдамдығы секундына 9-14 метр, кей аудандарда 15-20 метрге дейін жетеді. Ауа температурасы түнде 13-18 градус аяз, оңтүстікте 10 градусқа дейін төмендейді. Күндіз 8-13 градус аяз болады.

23 ақпанда түнде қайтадан қар мен боран күтіледі, облыстың оңтүстігі мен шығысында қатты қар жауады. Күндіз шығыста жаяу бұрқасын болуы мүмкін. Желдің жылдамдығы 9-14 метр, екпіні 15-20 метрге дейін, кей жерлерде 23-28 метрге дейін жетеді. Тәулік бойы ауа температурасы 20-25 градус аяз, шығыста шамамен 17 градус аяз болады.

24 ақпаннан бастап жауын-шашын тоқтайды, алайда облыстың батысы, солтүстігі мен оңтүстігінде тұман болуы ықтимал. Жел 9-14 метр, түнде кей жерлерде 15-20 метрге дейін күшейеді. Ауа температурасы күрт төмендеп, түнде 32-37 градус аяз, күндіз 25-30 градус аяз болады.

25 ақпанда құрғақ әрі аязды ауа райы сақталады. Түнде 32-37 градус аяз, күндіз 20-25 градус аяз күтіледі.

26 ақпанда ауа температурасы біртіндеп көтеріледі: түнде 27-32 градус аяз, оңтүстікте 24 градусқа дейін, күндіз 15-20 градус аяз, оңтүстікте шамамен 12 градус аяз болады.

27 ақпанда сәл жылынады. Түнде 22-27 градус аяз, оңтүстікте 19 градусқа дейін, күндіз 8-13 градус аяз, оңтүстікте шамамен 5 градус аяз күтіледі. Жауын-шашын болжанбайды, кей жерлерде тұман болуы мүмкін.

Алдын ала мәлімет бойынша, аптаның соңы жауын-шашынсыз өтеді, дегенмен аязды ауа райы сақталады. Өңір
тұрғындарына сапарды жоспарлау кезінде қолайсыз ауа райы жағдайларын ескеріп, қатты аяз бен боран кезінде сақтық шараларын сақтау ұсынылады.