СҚО-да референдум белсенділеріне Мемлекет басшысының наградалары мен Алғыс хаттары табысталды
Солтүстік Қазақстан облысы әкімдігінде Қазақстанның жаңа Конституциясын қабылдау жөніндегі республикалық референдумды даярлау және өткізуге үлес қосқан азаматтар құрметке бөленді, деп хабарлайды QZ NEWS тілшісі.
Іс-шараға мемлекеттік органдардың өкілдері, қоғамдық бірлестіктер мүшелері, сондай-ақ өңірдің маңызды қоғамдық-саяси оқиғаны ұйымдастыру мен өткізуге белсенді қатысқан тұрғындары қатысты.
Марапатталғандардың қатарында түрлі саланың өкілдері бар, оның ішінде бұқаралық ақпарат құралдарының қызметкерлері де бар.
Жиналған қауым алдында Солтүстік Қазақстан облысының әкімі Ғауез Нұрмұхамбетов сөз сөйледі. Ол өз баяндамасында өткен референдумның маңыздылығын атап өтіп, оның елдің әрі қарай дамуына қосқан үлесіне тоқталды.
«Біз бүгін еліміздің болашақ бағытын айқындаған тарихи шешімнен кейінгі жаңа кезеңде бас қосып отырмыз. Референдум тек саяси науқан ғана емес, бұл – қоғамның кемелденуінің көрінісі. Әрбір азамат әділеттілік, заң үстемдігі және даму жолын саналы түрде таңдады», – деді өңір басшысы.
Сонымен қатар, ол Мемлекет басшысы Қасым-Жомарт Тоқаевтың референдум халықтың ерік-жігерін, бірлігін және болашаққа деген жауапкершілігін айқын көрсеткенін атап өткен сөзін еске салды.
Өңір әкімі дауыс беру қорытындыларының артында нақты адамдар мен олардың күнделікті еңбегі тұрғанын ерекше атап өтті.
«Құрғақ статистиканың артында әрқайсыңыздың ортақ іске қосқан күш-жігеріңіз, уақытыңыз бен энергияңыз жатыр. Біреулер жергілікті жерде ұйымдастыру жұмыстарын жүргізсе, енді бірі түсіндіру жұмыстарымен айналысып, қоғамда сенім мен тұрақтылық қалыптастырды. Осындай нақты істер мемлекет тұрақтылығының негізін құрайды», – деді Ғауез Нұрмұхамбетов.
Болашақ міндеттерге де ерекше назар аударылды. Өңір басшысының айтуынша, жаңа Конституция нормаларын жүзеге асыру жүйелі әрі дәйекті жұмысты талап етеді.
«Бүгінгі рәсім – қорытынды емес, керісінше жаңа кезеңнің бастауы: шешімнен іске көшу, қолдаудан жауапкершілікке, сөзден нәтижеге өту», – деп атап өтті ол.
Жиын соңында облыс әкімі Солтүстік Қазақстан облысы алдағы уақытта да жоғары ұйымдастырушылық, жауапкершілік және үйлесімді жұмыс үлгісін көрсететініне сенім білдірді.
Салтанатты рәсім барысында өңірдің бірқатар белсенді тұрғындарына Мемлекет басшысы Қасым-Жомарт Кемелұлы Тоқаевтың атынан наградалар мен алғыс хаттар табысталды. Өз кезегінде марапат иелері көрсетілген сенім үшін алғыс білдіріп, референдумды ұйымдастыру мен өткізуге қатысу олар үшін маңызды азаматтық миссия болғанын атап өтті.