СҚО-дағы №51 колония қызметкерлері карамель кәмпиттерінің ішінен апиын анықтады
Солтүстік Қазақстан облысы бойынша ҚАЖ департаментіне қарасты №51 мекеме қызметкерлері колония аумағына тыйым салынған заттарды жеткізу әрекетінің жолын кесті. Есірткі заттары кәдімгі азық-түлік сәлемдемесі түрінде жасырылып өткізілмек болған, деп хабарлайды QZ NEWS тілшісі.
Сотталғандардың біріне жолданған сәлемдемені тексеру барысында инспекторлардың назарын карамель кәмпиттері аударды. Тәттілерді мұқият қарау кезінде олардың екеуінің ішінен қоңыр түсті ұнтақ зат салынған жасырын орамалар табылды.
Сараптама қорытындысына сәйкес, тәркіленген зат жалпы салмағы 0,9 грамм болатын апиын екені анықталды. Аталған факті бойынша сотқа дейінгі тергеп-тексеру басталды.
Қазіргі уақытта Қазақстан Республикасы Қылмыстық кодексінің 297-бабының 1-бөлігі бойынша қылмыстық іс қозғалды. Аталған бап заңсыз есірткі құралдарын дайындау, сатып алу, сақтау, тасымалдау немесе өткізу үшін жауапкершілікті көздейді.