Петропавлда Counter-Strike 2 бойынша үздік киберспортшылар анықталды

Петропавлда мектеп оқушылары мен студенттер арасында өткен ауқымды Counter-Strike 2 турнирінің қорытындысы шығарылды. 20–21 маусым күндері Kozybayev University-дің бірінші оқу ғимаратында өткен киберспорттық жарысқа өңірдің 14 командасы мен 70-ке жуық жас ойыншысы қатысты. Турнирді «Eko-Time» қоғамдық бірлестігі, Солтүстік Қазақстан облысының киберспорт федерациясы және облыстық жоғары оқу орны бірлесіп ұйымдастырды, деп хабарлайды QZ NEWS тілшісі.

Екі күн бойы қатысушылар жоғары тактикалық дайындықтарын, командалық үйлесімділіктерін және жеңіске деген жігерлерін көрсетті. Ойыншыларды қолдау үшін шамамен 50 жанкүйер келді. Негізгі матчтардан бөлек, ұйымдастырушылар көрермендерге арнап CS2 әлеміне қатысты интерактивті байқаулар мен викториналар өткізді. Бұл шараның қызығын арттырып, ерекше атмосфера қалыптастырды.

Турнирдің жүлде қоры 200 мың теңгені құрады. Тартысты бәсекенің қорытындысы бойынша жүлделі орындар төмендегідей бөлінді:

 1-орын — Qumys eSports командасы (100 000 теңге);

 2-орын — CyberLab командасы (60 000 теңге);

 3-орын — Team SoundCloud командасы (40 000 теңге).

Солтүстік Қазақстан облысының киберспорт федерациясының мәліметінше, мұндай жарыстар жастарға тек жарыс тәжірибесін беріп қана қоймай, өңірде мықты IT және гейминг қауымдастығын қалыптастыруға ықпал етеді. Сондай-ақ талантты ойыншылардың әлеуетін ашып, пікірлес адамдармен байланыс орнатуына мүмкіндік береді.

Ұйымдастырушылар төрешілер құрамына, серіктестерге және қатысушыларға жоғары тәртіп пен белсенділік танытқандары үшін алғыс білдірді. Сонымен қатар бұл турнирдің Петропавлдағы киберспортшылардың соңғы кездесуі емес екенін айтып, алдағы уақытта жаңа жарыстар ұйымдастырылатынын жеткізді.