Алика Мұхамадиева ісі бойынша сот: прокурор 4,5 жыл бас бостандығынан айыру жазасын сұрады
Қарағандыда әлеуметтік және ұлт араздықты тудырды деп айыпталған 23 жастағы Алика Мұхамадиева ісі бойынша екінші сот отырысы өтті, деп хабарлайды QZ NEWS ekaraganda.kz сайтына сілтеме жасап.
Қылмыстық іс 3 қазанда сотқа түскен. Қарағандылық қызға ҚР Қылмыстық кодексінің 174-бабының 1-бөлігі — «Әлеуметтік, ұлттық, рулық, нәсілдік немесе діни араздықты қоздыру» бойынша айып тағылған. 17 қазанда тараптардың пікірталастары өтті. Айта кетсек, алғашқы отырыста прокурор Фарида Сәдуова процесті жабық түрде өткізуді сұраған еді. Бұл ұсынысты айыпталушы мен қорғаушы тарап та қолдады. Алайда судья Арғын Құтышев өтінішті қанағаттандырмай, соттың ашық өтетінін мәлімдеді.
«Үйінде отырып, iPhone 15 Pro Max телефоны арқылы әлеуметтік желілерді пайдаланған Мұхамадиева “Алика Августова” деген лақап атпен азаматтардың діни және ұлттық сезімдерін қорлайтын белгілері бар пікірлер жариялаған. Өз жазбалары көпшілікке қолжетімді болатынын біле тұра, ислам дінін ұстанатын және қазақ ұлтына жататын адамдардың ар-намысы мен қадір-қасиетін төмендететін сөздер айтқан», — деп оқыды іс материалдарын прокурор Фарида Сәдуова.
Прокурордың айтуынша, сараптама жарияланған жазбалар қоғамда жағымсыз пікір қалыптастырып, дінаралық шиеленіске себеп болуы мүмкін екенін анықтаған. Мемлекеттік айыптау Алика Мұхамадиеваны жалпы режимдегі түзеу мекемесінде 4 жыл 6 айға бас бостандығынан айыру жазасын сұрады. Сонымен қатар прокурор айыпталушының екі жасар қызы бар екенін ескеріп, соттан жазаны өтеуді баласы 14 жасқа толғанға дейін кейінге қалдыру мүмкіндігін қарастыруды ұсынды.
Алғашқы отырыста Мұхамадиева өз кінәсін толық мойындап, ашық түрде өкініш білдірген болатын.
«Біз бостандығынан айырумен байланысты емес жаза тағайындауды сұраймыз. Заңда балама шаралар бар — бостандығын шектеу немесе айыппұл салу. Бұл бап бойынша айыппұлдың ең жоғары мөлшері шамамен 12 миллион теңге, бірақ сот жеңілдететін жағдайларды ескере отырып, аз соманы белгілеуі мүмкін. Айыпталушы өз сөздерінің қоғамда теріс әсер туғызғанын және мұсылмандар мен қазақ ұлты өкілдерінің сезімін жаралағанын түсінді. Ол шын жүректен өкініп, қоғамнан оқшаулаусыз жазасын өтеуге дайын», — деді адвокат Тимур Солодуха.
Мұхамадиева эмоциясын жасыра алмай, көз жасына ерік беріп, өзін ренжіткендердің бәрінен кешірім сұрады.
«Қоғам алдында, өзім ренжіткен барлық адамдардың алдында қатты ұяламын. Әсіресе мұсылмандардан, өз сеніміне адал жандардан. Мен ешкімді қорлағым келмеген, бірақ сөздің қаншалықты ауыр тиетінін түсіндім», — деді ол.
Қыз өз жазбаларын әжесінің қайтыс болғанынан кейінгі ауыр эмоционалды күйзеліс кезінде жариялағанын айтты.
«Мен алғашқы күннен бастап тергеуге толықтай ынтымақтастым. Ешқашан өз сөзімді жоққа шығарған емеспін, керісінше өз ұстанымымды түсіндіріп, сол күні-ақ кешірім сұрадым. Бұған шын жүректен өкінемін. Бұрын да айтқанмын, менің пікірлерім әжемнің өлімінен кейінгі терең күйзеліс пен ішкі бостықтың салдары болды. 22 жыл өмірімде алғаш рет жақын адамымды жоғалтып, ауыр күйзеліс пен уайымға тап болдым. Бұл сылтау емес екенін білемін, бірақ сол кезде өз сезімімді бақылай алмадым», — деді ол тараптар пікірталасы кезінде.
Мұхамадиеваның мүддесін екі адвокат пен қоғамдық қорғаушы ретінде оның әкесі қорғайды. Ол шілде айынан бері тергеу изоляторында қамауда отыр. Екінші отырыста қыз тағы да көзіне жас алып, сотқа жүгінді:
«Қазір мен әр сөздің салмағы бар екенін және көпшілік алдында да, жеке де не айтатыныңды сүзгіден өткізу керектігін түсіндім. Мен ешқашан адамдарды кемсітіп, араздық тудыратындардың қатарында болған емеспін. Мен ешкімге өшпенділік білдірмеймін, өзім де мұсылманмын. Бүкіл өмірім Қазақстанда өтті, мен осы елдің тілін де, мәдениетін де құрметтеймін. Өз кінәмді толық мойындадым, сабақ алдым. Қазір менің кішкентай қызым бар, ол бірнеше айдан бері анасынан айырылып отыр. Бұл мен үшін үлкен сынақ болды. Мен еркіндігімнен, отбасымнан, абыройымнан айырылдым. Бірақ осының бәрі маған үлкен өмірлік сабақ болды. Елден, ренжіткен адамдардан және ең бастысы ата-анамнан кешірім сұраймын», — деді ол.
Отырыстың соңында Мұхамадиева сотқа өтініш білдірді:
«Мені бостандығымнан айырмауыңызды сұраймын, егер бұл мүмкін болмаса — өтінем, жазаны өтеуді кейінге қалдырыңыз», — деді ол.
Осыдан кейін судья сот процесін 3 қарашаға дейін кейінге қалдырып, соңғы сөзге және істі аяқтауға дайындық басталғанын хабарлады.