Ақтауда буаз итті пышақтап кеткен

Ақтауда ауыр жарақат алған буаз ит өліп қалды. Оқиғаны полиция растады, қылмыстық іс қозғалды, деп хабарлайды QZ NEWS «NewTimes.kz» ақпарат агенттігіне сілтеме жасап.

Жануар іш тұсынан пышақ тәрізді тесілген жарақатпен ZOO Лекарь ветеринарлық клиникасына жеткізілген. Дәрігерлер қатты қан кетуді және тыныс алу қиындағанын тіркеген. Ветеринарлар шұғыл ота жасап, кесар тілігін жүргізіп, стерилизация жасаған. Күшіктерді аман алып қалу мүмкін болды, алайда иттің өзін құтқару мүмкін болмады.

Клиника өкілдерінің айтуынша, ота ұзаққа созылып, дәрігерлер жануардың өмірі үшін соңына дейін күрескен. Таңертең ит көз жұмды. Күшіктер еріктілерге берілді.

Қазір күшіктерге емізетін ит табылып, олар бақылауда болып, қажетті күтім алуда.
Полиция бұл дерек бойынша жануарларға қатыгездік көрсету фактісімен іс қозғалғанын хабарлады.

«Қажетті тергеу әрекеттері жүргізілуде. Қазіргі уақытта оқиғаға қатысы бар тұлғаларды анықтау және ұстауға бағытталған жедел-іздестіру шаралары қолға алынды», – делінген хабарламада.

Осы уақытта Мәжілісте «Жануарларға жауапкершілікпен қарау туралы» заңға түзетулер мақұлданды. Құжатқа сәйкес, ауланған жануарлар міндетті түрде уақытша ұстау орындарына жіберілуі тиіс, бұл олардың қайтадан қала көшелеріне жіберілуін болдырмауға бағытталған. Сонымен қатар, қаңғыбас жануарларды бюджет есебінен вакцинациялау нормасы алып тасталады. Оның орнына олардың санын реттеу шаралары енгізіледі, оның ішінде эвтаназия қолдану мүмкіндігі қарастырылған. Ресми мәлімет бойынша, бұл халықтың денсаулығын қорғау және аурулардың таралуын болдырмау үшін қажет.

Аталған түзетулер қоғамда үлкен резонанс тудырды: әлеуметтік желілерде және қоғамдық кеңістікте қазақстандықтар жаңа нормалар қаңғыбас жануарларды жаппай жоюға әкелуі мүмкін деп алаңдаушылық білдіруде.