Ашық аспан астындағы концерт пен майдан жылдарының жүрек тебірентер әуендері

Петропавлдағы «Мәңгілік алау» мемориалына гүл қою рәсімінен кейін мерекелік шаралар Ұлы Отан соғысында қаза тапқандарды еске алуға арналған Ақан Сері атындағы Солтүстік Қазақстан облыстық филармониясының концертімен жалғасты. Өнерпаздар Николай Погодин атындағы театрдың алдында да өнер көрсетті, деп хабарлайды QZ NEWS тілшісі.

Салқын ауа райы мен сіркіреп жауған жаңбырға қарамастан, көрермендер еске алу рәсімінен кейін тарауға асықпады.

Концерттік бағдарлама майдангерлер мен тыл еңбеккерлерінің ерлігіне арналған вокалдық және хореографиялық қойылымдарды біріктірді. Жалпы өнерпаздар шамамен 22 нөмір дайындаған. Филармонияның көркемдік жетекшісі Біржан Есжановтың айтуынша, бағдарламада «Туған жер» би ансамблінің қойылымы ерекше орын алған.

«“Өліспей беріспеу” – прологтың атауы осындай. Бұл бізді сол қиын жылдарға жетелеп, аталарымыздың қалай соғысқанын, қандай ерлік пен батылдық көрсеткенін бейнелейді. Мұның бәрі бидің тілі арқылы көрініс табады», – деді Біржан Есжанов.

Концертке филармонияның үлкен шығармашылық ұжымы мен камералық хор қатысты. Бағдарламаға қазақ және орыс тілдеріндегі соғыс жылдарының әндері енді.

«Соғыс жылдары туралы әндер өте көп. Әрқайсысының өзіндік тағдыры, өзіндік тарихы бар. Қазақша да, орысша да әндер шырқалады. Бағдарламада тек мұңды әндер ғана емес», – деп атап өтті Біржан Есжанов.

Көрермендер өнерпаздарды ыстық ықыласпен қарсы алып, қол соғып отырды, көпшілік таныс әндерді бірге шырқады. Жиналған жұрт үшін бұл концерт мерекелік шаралардың жалғасы ғана емес, Жеңістің бағасын, майдангер ұрпақтың ерлігін және тарихи жадыны сақтаудың маңызын тағы бір еске салған тағылымды кеш болды.