Астаналық 19 жастағы тұрғын Петропавлда мефедронның ірі партиясымен ұсталды

Солтүстік Қазақстан облысында полиция қызметкерлері Петропавл қаласына есірткі жеткізу арнасын тоқтатты. 7 мамыр күні Парковая көшесінде Астана қаласының 19 жастағы тұрғыны ұсталды. Ол синтетикалық есірткі таратуға күдікті, деп хабарлайды QZ NEWS.

СҚО ПД мәліметінше, ұстау кезінде жас жігіттен ұнтақ тәрізді зат салынған 88 орама тәркіленді. Сараптама бұл жалпы салмағы 90 грамм болатын психотроптық зат — мефедрон екенін көрсетті. Полицейлердің айтуынша, бұл көлем шамамен 300 адамды есірткіге тәуелді етуге жеткілікті.

«Күдіктінің айтуынша, ол бұл заңсыз әрекетке наурыз айында кіріскен. Аталған факті бойынша тергеу жүргізілуде. Аса ірі көлемде есірткі сатқан жағдайда оған 7 жылдан 12 жылға дейін бас бостандығынан айыру жазасы қарастырылған. Жыл басынан бері СҚО-да 112 есірткі құқықбұзушылығы тіркелді, оның 58-і — есірткі сату фактілері», — делінген СҚО ПД хабарламасында.