Атырау облысының Құлсары қаласында оқушы мектепте балта ұстап жүгірген: зардап шеккендер бар: бейнежазба

Атырау облысының Құлсары қаласында 10-сынып оқушысы қатарластарымен жанжалдан кейін мектеп ішінде балта ұстап жүгіріп, басқа оқушыларға шабуыл жасаған. Оқиға салдарынан екі жасөспірім зардап шекті, деп хабарлайды QZ NEWS Tengrinews.kz сайтына сілтеме жасап.

Атырау облыстық полиция департаментінің мәліметінше, 5 ақпан күні «102» арнасына мектеп оқушысының қатарластарымен сөзге келіп, оларға шабуыл жасағаны туралы хабарлама түскен. Оқиғадан кейін ол оқу орнының аумағынан қашып кеткен.

Бейнежазбада балта ұстаған жасөспірімнің өзге оқушыларды қуып жүргені көрінеді.

Оқиға нәтижесінде екі оқушы жеңіл дене жарақатын алған. Қоңырау түскен соң оқиға орнына полиция қызметкерлері жедел жеткен. Шабуыл жасаған жасөспірім анықталып, ұсталды.

Жанжалға қатысқан барлық тұлғалар, сондай-ақ олардың ата-аналары мән-жайды анықтау үшін полиция бөліміне жеткізілді. Бұзақылық дерегі бойынша қылмыстық іс қозғалды. 15 жастағы күдікті уақытша ұстау изоляторына қамалып, ішкі істер органдарының есебіне алынды.
Іс материалдары процессуалдық шешім қабылдау үшін кәмелетке толмағандар істері жөніндегі комиссияға жолданды.

«Сонымен қатар жасөспірімнің ата-анасына қатысты кәмелетке толмаған баланы тәрбиелеу міндеттерін тиісінше орындамағаны үшін әкімшілік іс қозғалды», – деп хабарлады Атырау облыстық полиция департаментінің баспасөз қызметі.

Қылмыстық іс аясында қылмыстың жасалуына ықпал еткен себептер мен жағдайларды жою жөнінде білім беру бөліміне ұсыныс енгізілді.

Тергеу нәтижелері бойынша білім беру ұйымының лауазымды тұлғаларының, сондай-ақ оқу орнының қауіпсіздігін қамтамасыз еткен күзет агенттігі қызметкерлерінің әрекеттеріне құқықтық баға берілетін болады.