Ғауез Нұрмұхамбетов Петропавл супермаркеттеріндегі азық-түлік бағасын тексерді
Петропавл қаласында Ғауез Нұрмұхамбетов облыс орталығындағы ірі сауда орындарында әлеуметтік маңызы бар азық-түлік тауарларының бағаларын тексерді, деп хабарлайды QZ NEWS.
Өңірде бағаның өсуін тежеу мақсатында тұрақтандыру қоры жұмыс істейді. Өткен жылы оның қаржыландыру көлемі 2,9 млрд теңгені құрады, шамамен 13 мың тонна өнім сатып алынды, бұл қала халқының үш айлық қажеттілігінің 50 пайызына тең. Қазіргі таңда тұрақтандыру қорының қорлары шамамен 12 мың тоннаны құрайды.
«Облыста әлеуметтік маңызы бар азық-түлік тауарларына сауда үстемесі 15 пайыздан аспайды. Әлеуметтік маңызы бар азық-түлік тауарларының тізімі 19 атаудан 31 атауға дейін кеңейтілді, бұл халықты қолжетімді бағамен алуан түрлі өнімдермен қамтамасыз етуге мүмкіндік береді. Барлық өнім 32 сауда нүктесі арқылы, оның ішінде ірі сауда желілері, сондай-ақ Петропавл мен Бескөлде орналасқан тұрақтандыру қорының 8 нүктесі арқылы сатылуда. Бағаның негізсіз өсуіне жол бермеу бойынша бақылауды арнайы мониторингтік топ жүзеге асырады», – деп атап өтті өңір басшысы.