«Комиссия үйлесімді әрі нақты жұмыс істейді», — «ДАУЫС» қоғамдық байқаушылар коалициясының өкілі Асем Бекболатова
15 наурызда Қазақстанда жаңа Конституцияны қабылдау мәселесі бойынша республикалық референдум өтіп жатыр. Ел бойынша азаматтар мемлекеттік маңызды құжатқа қатысты өз ұстанымдарын білдіре алатын сайлау учаскелерінің жұмысы ұйымдастырылған. Процестің маңызды бөлігі — заңнаманың сақталуын және дауыс беру рәсімінің ашықтығын қадағалайтын қоғамдық байаушылардың қатысуы, деп хабарлайды QZ NEWS тілшісі.
Петропавлдағы №593 референдум учаскесінде дауыс беру барысын қоғамдық ұйымдардың өкілдері бақылауда ұстап отыр. Солардың бірі — Асем Бекболатова, «ДАУЫС» қоғамдық бақылаушылар коалициясының өкілі. Ол дауыс беру тыныш және ұйымдасқан жағдайда өтіп жатқанын, комиссия жұмысының бекітілген талаптарға сәйкес екенін атап өтті.
«Мен референдумның ашықтығын қадағалап отырмын, комиссия үйлесімді әрі нақты жұмыс істейді. Мүмкіндігі шектеулі адамдарға ерекше көңіл бөлінгенін атап өткім келеді — барлық қажетті жағдай қарастырылған. Дауыс беру адал және заңға сәйкес өтуде», — деді байқаушы.
Асем Бекболатова учаскеде барлық азаматтар, оның ішінде ерекше қажеттіліктері бар адамдар үшін дауыс беруге қолайлы жағдай жасалғанын атап өтті. Оның айтуынша, комиссия дауыс беру процесі әркім үшін қолжетімді әрі ыңғайлы болу үшін алдын ала қажетті құралдарды дайындаған.
«Учаскеде толық тәртіп сақталған, комиссия нұсқаулыққа сәйкес жұмыс істейді, менде ешқандай ескерту жоқ. Көрмейтін адамдар үшін Конституцияның аудио-нұсқасы мен арнайы лупалар кабиналарда дайын — бұл адал дауыс беру үшін маңызды жағдайлар. Заңның сақталып жатқаны қуантады, ал мүмкіндігі шектеулі адамдар туралы алдын ала ойланғандары жақсы», — деп қосымша айтты ол.
Жалпы, №593 сайлау учаскесінде шамамен 1800 дауыс беруші тіркелген. Сағат 15:00-ге дейін олардың шамамен жартысы — 50 пайыз дауыс берген. Комиссия мүшелері мен байқаушылардың байқауынша, тұрғындар бүкіл күн бойы учаскеге келіп, референдумға қызығушылық танытып, ел үшін маңызды мәселеге белсенді қатысуда.
Байқаушылар учаскелер жабылғанға дейін дауыс беру процесін қадағалауды жалғастырады.