Отбасылық дәстүр мен ұрпақ сабақтастығы: Қызылжар ауданында Жеңіс күні қалай аталып өтті

9 мамыр мерекесі тек Петропавлда ғана емес, Солтүстік Қазақстан облысының аудандарында да кең көлемде аталып өтті. Қызылжар ауданының Бескөл ауылында таңертеңнен бастап орталық алаңға Ұлы Отан соғысы батырларын еске алуға келген тұрғындар жиналды, деп хабарлайды QZ News тілшісі.

Бескөл ауылында Жеңіс күні бір минут үнсіздіктен басталды. Одан кейін орталық алаңдағы монументке гүл шоқтары мен венок қою рәсімі өтті. Жергілікті тұрғындар отбасыларымен бірге келіп, бейбіт аспан сыйлаған батырларды еске алды. Іс-шараға мемлекеттік органдардың өкілдері, соның ішінде аудан әкімі Бейбіт Исманов қатысты.

«Бүгін біз үшін ерекше күн – Ұлы Жеңістің 81 жылдығы. Қызылжар ауданының тұрғындары мен қонақтарын Жеңіс күнімен құттықтаймын. Баршаңызға зор денсаулық, амандық және ең бастысы – бейбіт аспан тілеймін», – деді аудан әкімі.

Бескөл ауылының тұрғыны Людмила Дедова Ұлы Отан соғысының ардагері болған әкесі туралы мақтанышпен және жылылықпен еске алады. Дәстүр бойынша олар жыл сайын бұл күнді отбасымен бірге атап өтеді. Людмила Константиновна үшін бұл күн әкесі – Константин Дедовтың ерлігі мен қайсарлығын еске алатын ерекше сәт.

«Ол соғыс туралы көп айта бермейтін. Құпия әскер қатарында қызмет етті, командир болды. Беларусьті азат етуге қатысқан. Ұлы Отан соғысынан кейін Жапониядағы соғысқа да барған. Көптеген марапаттары болды, тіпті Президенттен келген алғыс хаттары да бар. Бейбіт кезде өмір бойы еңбек етті, партия қызметкері болды. 90 жасқа дейін жұмыс істеп, жергілікті ардагерлер кеңесін алғаш басқарған адам болды. Өте мықты буын еді», – деді ол.

Мереке салтанатты концерттік бағдарламамен жалғасты. Орталық алаңда тақырыптық әндер шырқалып, шығармашылық ұжымдар патриоттық нөмірлер ұсынды. Бескөл ауылы нағыз Ұлы мерекенің рухына бөленді.