Петропавл әкімдігі ірі көлемді қоқысты контейнерлерге тастауға тыйым салынатынын еске салды

Петропавл қаласының әкімдігі облыс орталығының тұрғындары мен ұйымдарына құрылыс және ірі көлемді қоқысты қоқыс алаңдарына тастауға қатаң тыйым салынатынын тағы да еске салды, деп хабарлайды QZ NEWS.

«Ірі көлемді қалдықтарға биіктігі, ені немесе ұзындығы 50 см-ден асатын заттар жатады. Оларға жиһаз, тұрмыстық техника, сантехника және басқа да көлемді заттар кіреді. Құрылыс және ірі көлемді қалдықтарды тұрғындар мен ұйымдар өздері шығаруы тиіс», – делінген хабарламада.

Құқықбұзушылықтарға жедел әрекет ету үшін Петропавл қаласында қазіргі таңда шамамен 100 бейнебақылау камерасы жұмыс істеп тұр. Сонымен қатар, қоқыс алаңдарында заңсыз қоқыс тастауды тіркейтін жасанды интеллект элементтері бар қосымша 43 камера орнатылған. Келесі жылы тағы 200 осындай камера орнату жоспарлануда.

Бейнебақылау жүйелері арқылы анықталған бұзушылық жасаған азаматтар жауапкершілікке тартылады. Полиция мәліметінше, ірі көлемді қоқыс тастағаны үшін Қазақстан Республикасының Әкімшілік құқықбұзушылық туралы кодексінің 505-бабына сәйкес жаза қарастырылған.

«ҚР ӘҚБтК-нің 505-бабының 1-бөлігіне сәйкес, ескерту немесе 20 АЕК мөлшерінде әкімшілік айыппұл көзделген. Қайта заң бұзған жағдайда айыппұл 30 айлық есептік көрсеткішті немесе шамамен 120 мың теңгені құрайды», – деп хабарлады СҚО Полиция департаментінде.

Әкімдік сондай-ақ қазіргі таңда ірі көлемді қоқысты шығару қызметі жалпы тарифке енгізілмегенін атап өтті. Алайда бұл қызметті келесі жылы тарифке енгізу мәселесі қарастырылып жатыр.